ძალიან განვიცდით ტრაგიკულ მოვლენებს, რომელიც ყაზახეთში განვითარდა და რომელთა შედეგად დაიღუპა ათობით ადამიანი, -  ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.

მთავრობის მეთაურმა ასევე ისაუბრა ყაზახეთში მყოფ საქართველოს მოქალაქეებზე და აღნიშნა, რომ  მათი ნაწილი დაბრუნდა საქართველოში, ხოლო საქართველოს იმ მოქალაქეებთან, ვინც რჩებიან ადგილზე, საელჩო აგრძელებს აქტიურ კომუნიკაციას, საჭიროების შემთხვევაში უწევს დახმარებას და მათი საქართველოში დაბრუნება მოხდება უახლოეს დღეებში.

„მინდა გამოვეხმაურო ყაზახეთში მიმდინარე მოვლენებს. რა თქმა უნდა, ჩვენ ძალიან ყურადღებით ვაკვირდებოდით ბოლო დღეებში განვითარებულ მოვლენებს. ძალიან განვიცდით ტრაგიკულ მოვლენებს, რომელიც ყაზახეთში განვითარდა და რომელთა შედეგად დაიღუპა ათობით ადამიანი. იმედს გამოვთქვამთ, რომ ყველა ზომა იქნება მიღებული უმოკლეს ვადებში ვითარების საბოლოოდ დეესკალაციის, უსაფრთხოებისა და სტაბილურობის მიღწევის მიზნით. გვსურს, რომ ქვეყანამ ძალიან მალე შეძლოს კრიზისის შედეგების დაძლევა და სვლის გაგრძელებას შემდგომი განვითარების მიმართულებით ვუსურვებთ ჩვენს მოძმე ყაზახეთს და ყაზახ ხალხს.
რაც შეეხება ყაზახეთში მყოფ საქართველოს მოქალაქეებს, საქართველოს დიპლომატიური წარმომადგენლობა შესაძლებლობის ფარგლებში ხაზზე იყო მათთან და უწევდა შესაბამის დახმარებას ადგილზე. მთავრობის აქტიური მუშაობის შედეგად, მათი ნაწილი, იცით, რომ დაბრუნდა საქართველოში. საქართველოს იმ მოქალაქეებთან, ვინც რჩებიან ადგილზე, საელჩო აგრძელებს აქტიურ კომუნიკაციას და საჭიროების შემთხვევაში უწევს დახმარებას. მათი საქართველოში დაბრუნება მოხდება უახლოეს დღეებში“, -  განაცხადა პრემიერმა.