შეერთებულ შტატებში ექიმებმა გენეტიკურად მოდიფიცირებული ღორის გული ადამიანს წარმატებით გადაუნერგეს. ქირურგების თქმით, გადანერგვიდან სამი დღის შემდეგ გული ნორმალურად მუშაობს და 57 წლის პაციენტი თავს კარგად გრძნობს. ინფორმაცია წარმატებული ოპერაციის შესახებ 10 იანვარს მერილენდის უნივერსიტეტის სამედიცინო ფაკულტეტის მიერ გავრცელდა.

 „ორგანოს გადანრეგვის ოპერაციამ პირველად ცხადყო, რომ გენეტიკურად მოდიფიცირებული ცხოველის გულმა, შესაძლოა იმუშაოს ორგანიზმის მიერ მყისიერი მიუღებლობის გარეშე“, - ნათქვამია ინფორმაციაში.

„ეს იყო ნოვატორული ოპერაცია, რომელიც კიდევ ერთი ნაბიჯით გვაახლოებს კრიზისის გადაჭრასთან, რომელიც ორგანოების დონორთა ნაკლებობას უკავშირდება“, - აღნიშნა ქირურგმა ბარტლი გრიფიტმა, რომელმაც ღორის გულის იმპლანტაციის ოპერაცია ჩაატარა. მისი თქმით,  მსოფლიოში პირველი ასეთი ოპერაცია აძლევს იმედს მომავალ პაციენტებს, რომლებსაც ორგანოების მიღების შესაძლებლობა არ აქვთ.

მერილენდის უნივერსიტეტში განმარტეს, რომ  პაციენტისთვის ღორის გულის გადანერგვა მკურნალობის ერთადერთი შანსი იყო გადარჩენისთვის

 „მე არჩევანი მქონდა: ან მოვმკვდარიყავი ან გულის გადანერგვა გამეკეთებინა. მე სიცოცხლე მინდა, ვიცი, რომ შანსები მცირეა, მაგრამ ეს ჩემი ბოლო არჩევანია“, - განაცხადა პაციენტმა დევიდ ბენეტიმ ოპერაციის დაწყებამდე.

მხოლოდ აშშ-ში ამ დროისათვის 100 000-მდე ადამიანი დონორის ორგანოს ელოდება. ოფიციალური მონაცემებით,  ყოველდღე დონორის მოლოდინში 6 000-ზე მეტი ადამიანი კვდება.

დონორების სიმცირის გამო მეცნიერები იმედს ამყარებენ ე.წ. ქსენოტრანსპლანტაციაზე - ეს არის ერთი ბიოლოგიური სახეობის ორგანიზმიდან ორგანოების, ქსოვილების ან უჯრედული ორგანოიდების გადანერგვა მეორე ბიოლოგიური სახეობის ორგანიზმში.