კიდევ ერთხელ დადასტურდა, რასაც სამი წლის განმავლობაში ვამბობდით, რომ არანაირ ფულის გათეთრებას ადგილი არ აქვს და ეს მოსამართლემ დღეს დაადასტურა, - ამის შესახებ ადვოკატმა ზვიად კორძაძემ ხაზარაძე-ჯაფარიძე-წერეთლის საქმეზე განაცხადა.

„კიდევ ერთხელ დადასტურდა, რასაც სამი წლის განმავლობაში ვამბობდით, რომ არანაირ ფულის გათეთრებას ადგილი არ აქვს და ეს მოსამართლემ დღეს დაადასტურა. დღევანდელი განაჩენი იყო სახის შენარჩუნება ბრალდების მხარისთვის. უცნაურია, რომ სამართლებრივად საქმეში დაზარალებული არ არის. თაღლითობის მუხლს დაზარალებული სჭირდება. ვინც მოიაზრება დაზარალებულად, ის აცხადებს, რომ დაზარალებული არ არის. ამიტომ ეს განაჩენი ამ ფორმითაც კი თავს ვერ დაიკავებს ზემდგომ ინსტანციებში და საბოლოო ჯამში გამართლებით დამთავრდება. პირველი ეტაპი მოგებულია და რაც მთავარია, ამ საქმეში დადგენილია, რომ არავითარ ფულის გათეთრებას ადგილი არ აქვს.

ზუსტად ამ ბრალდებით ტარდებოდა ის პრესკონფერენციები, ანაკლიის პორტის მშენებლობასთან ერთად, პროკურატურა ყოველ ორ კვირაში გამოდიოდა და ფულის გათეთრებას იძახდა. როგორც სამი წლის წინ ვეუბნებოდით პროკურატურას, ფულის გათეთრება ვერ დადგინდებოდა, ასევე გპირდებით, რომ აქ არც თაღლითობა დაიკავებს თავს. უბრალოდ თაღლთობას ადგილი არ აქვს“, – განაცხადა ზვიად კორძაძემ.

საქალაქო სასამართლომ მამუკა ხაზარაძის, ბადრი ჯაფარიძისა და ავთანდილ წერეთლის საქმეზე ბრალდებები ფულის გათეთრების მუხლიდან თაღლითობის მუხლით გადააკვალიფიცირა, ისინი ამ მუხლით დამნაშავედ ცნო და შვიდი წლით პატიმრობა მიუსაჯა, თუმცა საქმის ხანდაზმულობის გამო სისხლის სამართლებრივი პასუხისმგებლობისგან გაათავისუფლა..