დღეს, პარლამენტის საპროცედურო საკითხთა და წესების კომიტეტი ბადრი ჯაფარიძის, ელენე ხოშტარიასა და შალვა ნათელაშვილის სადეპუტატო უფლებამოსილების შეწყვეტის საკითხს განიხილავს.

საკომიტეტო განხილვის შემდეგ, საბოლოო გადაწყვეტილებას კანონმდებლები პარლამენტის პლენარულ სხდომაზე მიიღებენ.

საპროცედურო საკითხთა და წესების კომიტეტის თავჯდომარის გურამ მაჭარაშვილის განცხადებით, შალვა ნათელაშვილისა და ელენე ხოშტარიას შემთხვევაში უფლებამოსილების შეწყვეტის საფუძველი არასაპატიო გაცდენებია, ხოლო ბადრი ჯაფარიძის შემთხვევაში - კანონიერ ძალაში შესული სასამართლოს გამამტყუნებელი განაჩენი.

"რაც შეეხება შალვა ნათელაშვილსა და ელენე ხოშტარიას, თუ პარლამენტის წევრი ერთ სესიაზე ნახევარზე მეტჯერ არ დაესწრება არასაპატიო მიზეზით პარლამენტის სხდომებს, ეს გახლავთ უფლებამოსილების შეწყვეტის საფუძველი. რაც ეხება ბადრი ჯაფარიძეს, გამამტყუნებელი განაჩენი არის შესული ძალაში ბადრი ჯაფარიძის მიმართ და რეგლამენტიდან გამომდინარე, ეს გახლავთ იმის საფუძველი, რომ ჩვენმა კომიტეტმა იმსჯელოს ამასთან დაკავშირებით", - განაცხადა მაჭარაშვილმა.

არასამთავრობო ორგანიზაცია "დემოკრატიის ინდექსი - საქართველო" მოუწოდებს პარლამენტს, არ შეუწყვიტოს მანდატი ბადრი ჯაფარიძეს.

განახლება: ცოტა ხნის წინ, ცნობილი გახდა, რომ კომიტეტის სხდომა, სადაც აღნიშნულ საკითხზე უნდა ემსჯელად, გადაიდო. როგორც იუწყებია, კომიტეტის რამდენიმე წევრი კოვიდკონტაქტია. შემდეგი სხდომის თარიღი უცნობია.