დაპირისპირება იყო ბათუმში ოპოზიციის დეპუტატებსა და სამართალდამცველებს შორის. პოლიციამ ოპოზიციის წევრები მერიიდან ძალის გამოყენებით გაიყავანა.

"ნაციონალური მოძრაობა'' ბათუმის მერთან შეხვედრას ითხოვდა, თუმცა მათთან შესახვედრად არჩილ ჩიქოვანი არ მივიდა. ოპოზიციონერები ჩიქოვანის კაბინეტის წინ, ბრიფინგის ოთახში შევიდნენ, საიდანაც პოლიციამ მათი ძალის გამოყენებით გაყვანა დაიწყეს.

მერიის შენობის დერეფანში ხმაური ამ წუთებში ისევ გრძელდება. უმაღლესი საბჭოს „ნაციონალური მოძრაობის“ დეპუტატები ჯერჯერობით შენობის დატოვებას არ აპირებენ.

გავრცელებული ონფორმაციით, არჩილ ჩიქოვანი ადგილზე არ იმყოფება, თუმცა მერიის პრესსამსახურმა ჩიქოვანის ვიდეომიმართვა გაავრცელა, სადაც არჩილ ჩიქოვანი აცხადებს, რომ ოპოზიციასთან შეხვედრა პრობლემა არ არის.

„ოპოზიციასთან შეხვედრის პრობლემა ზოგადად, არ დგას. ის საცირკო წარმოდგენები და ყოველდღიური დესტრუქცია, რომელსაც ისინი ახორციელებენ ჩვენი თანამოქალაქეების ინტერესების საზიანოდ, ქალაქ ბათუმის მუნიციპალიტეტის ყოველდღიური საქმიანობის ხელშეშლის მიზნით, ბუნებრივია, მიუღებელია ჩვენთვის.

ჩვენთვის მთავარი პრიორიტეტი არის ჩვენი თანამოქალაქეები, მათზე ზრუნვა და ის პროგრამები, რომელიც გათვალისწინებულია ბიუჯეტით“,- განაცხადა არჩილ ჩიქოვანმა.