პარლამენტის ბიურომ დეპუტატ ნატო ჩხეიძის საკანონმდებლო ინიციატივის დაჩქარებული წესით განხილვის თაობაზე იმსჯელა, რომელიც კანონმდებლებს შრომის კოდექსში საქართველოს დამოუკიდებლობის დღის აღნიშვნას 26 მაისის ნაცვლად 9 აპრილს სთავაზობს.

„ჩვენი ქვეყნის კონსტიტუციის პირველივე მუხლის, პირველ პუნქტში წერია, რომ ჩვენი დღევანდელი სახელმწიფო არის 1991 წლის 9 აპრილის აქტის საფუძველზე შექმნილი დამოუკიდებელი სახელმწიფო. მას შემდეგ ქვეყანაში რიგი ტრაგედიები მოხდა და არცერთი არ აღნიშნულა, ხოლო 1995 წელს კონსტიტუციის მიღების დღიდან, მიუხედავად იმისა, რომ კონსტიტუციაში სწორედ 9 აპრილია ჩაწერილი, მაშინდელი პრეზიდენტის ედუარდ შევარდნაძის მიერ, გარკვეული ისტორიკოსების ფალსიფიცირებული ახსნების საფუძველზე, დამოუკიდებლობის დღედ 26 მაისი დაინიშნა და არა 9 აპრილი“, - განაცხადა ნატო ჩხეიძემ. დეპუტატის თქმით, 9 აპრილი მხოლოდ გლოვის დღედ აღინიშნება.

საპროცედურო საკითხთა და წესების კომიტეტის თავმჯდომარის პირველი მოადგილის, გურამ მაჭარაშვილის განმარტებით, საკითხი მნიშვნელოვანია, თუმცა 26 მაისი საქართველოს დამოუკიდებლობის გამოცხადების, ხოლო 9 აპრილი დამოუკიდებლობის აღდგენის დღეა.

ბიუროს გადაწყვეტილებით, პარლამენტი აღნიშნულ კანონპროექტს არა დაჩქარებული, არამედ ჩვეულებრივი წესით განიხილავს.