რუსეთის პრეზიდენტი ვლადიმირ პუტინი აცხადებს, რომ ნატო-ში უკრაინის გაწევრიანება, ყირიმის გამო რუსეთსა და ალიანსს შორის სამხედრო კონფლოქტის საფრთხეს შექმნის.

ამის შესახებ მან უნგრეთის პრემიერ ვიქტორ ორბანთან შეხვედრის შემდეგ პრესკონფერენციაზე განაცახდა.

„დოქტრინალურ დოკუმენტებში თავად უკრაინის მიერ ჩაწერილია, რომ ის აპირებს ყირიმის დაბრუნებას, მათ შორის სამხედრო გზით,“- განაცხადა პუტინმა.

„წარმოვიდგინოთ, რომ უკრაინა ნატო-ს წევრია, იარაღით სავსე. დგას {უკრაინაში} თანამედროვე დარტყმითი სისტემები, როგორც პოლონეთსა და რუმინეთში და იწყებს ოპერაციას ყირიმში, არ ვსაუბრობ დონბასზე. წარმოვიდგინოთ, რომ უკრაინა ნატო-ს ქვეყანაა და იწყებს ამ სამხედრო ოპერაციებს. ჩვენ, რა ნატო-ს ბლოკის წინააღმდეგ უნდა ვიომოთ? ვინმე ამაზე დაფიქრებულა? როგორც ჩანს, არა“, - განაცხადა პუტინმა.

მისი თქმით, აშშ და ნატო უგულებელყოფენ რუსეთის შეშფოთებას, როდესაც საუბრობენ სხვა ქვეყნების უფლებებზე ალიანსში გაწევრიანების შესახებ. „მაგრამ არ შეიძლება რომელიმე ქვეყნის უსაფრთხოების გაძლიერება სხვების ხარჯზე“, - დასძინა პიტინმა.

26 იანვარს აშშ-მა რუსეთს წარუდგინა წერილობითი პასუხი, რომელშიც განაცხადა, რომ ნატო უარს არ იტყვის გაფართოებაზე და აღნიშნა, რომ ყველა სახელმწიფოს აქვს უფლება აირჩიოს მოკავშირეები და ალიანსები.