ესპანური გამოცემა El Pais-ი აქვეყნებს შეერთებული შტატებისა და ჩრდილოატლანტიკური ალიანსის წერილობით პასუხებს, რომელიც მათ რუსეთის მოთხოვნების საპასუხოდ მოამზადეს.

შეერთებული შტატები და ნატო უარყოფენ ევროპის უსაფრთხოების შესახებ რუსეთის მიერ შემოთავაზებული შეთანხმების მთავარ დებულებებს და ასევე, ალიანსის კარის დახურვას უკრაინის მომავალი ინტეგრაციისთვის.

ნატო-ს გაფართოებაზე უარის თქმა, რუსეთის ერთ-ერთი მთავარი მოთხოვნა იყო. ამის საპირისპიროდ, ვაშინგტონმა და ბრიუსელმა პუტინს შეიარაღების კონტროლის თაობაზე მოლაპარაკებებსა და ნდობის აღდგენის მიზნით, სხვადასხვა პლატფორმებში დიალოგში მონაწილეობას სთავაზობენ.

გარდა ამისა, რუსეთის ერთ-ერთი მთავარი მოთხოვნა იყო, რომ ნატოს ძალები გასულიყვნენ იმ ქვეყნებიდან, რომლებიც ალიანსს 1997 წლის შემდეგ შეუერთდნენ. ვაშინგტონისა და ბრიუსელის წერილებში ეს მოთხოვნა საერთოდ არ არის განხილული.

დოკუმენტში შეერთებული შტატები და ნატო დაჟინებით მოუწოდებენ რუსეთს, გადადგას დეესკალაციისკენ მიმართული ნაბიჯები და გაიყვანოს ჯარები უკრაინის საზღვრიდან. დეესკალაცია და ჯარების უკან დახევა არის უსაფრთხოების თაობაზე დიალოგის დაწყების მთავარი პირობა.

შეერთებული შტატების მიერ მომზადებულ დოკუმენტში ხაზგასმით აღნიშნულია, რომ ვაშინგტონი აგრძელებს ნატოს ღია კარის პოლიტიკის მტკიცე მხარდაჭერას და შესაბამისად, არ გამორიცხავს უკრაინის ან საქართველოს ალიანსში სამომავლო გაწევრიანებას.

გარდა ამისა, ვაშინგტონი მზაობას გამოთქვამს, ჩაებას დისკუსიებში უსაფრთხოების განუყოფლობასთან დაკავშირებით. რუსეთი უსაფრთხოების განუყოფლობის პრინციპს არგუმენტად იყენებს იმის მტკიცებისთვის, რომ ნატო-ში უკრაინის გაწევრიანება გავლენას მოახდენს მის უსაფრთხოებაზე. მაგრამ ვაშინგტონი თავის წერილში აღნიშნავს, რომ არ იზიარებს რუსეთის ინტერპრეტაციას, რადგან უსაფრთხოების განუყოფლობის კონცეფია "არ შეიძლება იზოლირებულად განიხილებოდეს".

შეერთებული შტატები ახსენებს რუსეთს მის მიერვე ხელმოწერილ ვალდებულებებს, რომ ყველა სახელმწიფოს ფუნდამენტური უფლებაა, თავად აირჩიოს თავისი უსაფრთხოების მექანიზმები და ალიანსები.

ვაშინგტონი ასევე მზადაა, შეიქმნას მექანიზმი, რათა რუსეთი დარწმუნდეს, რომ პოლონეთსა და რუმინეთში არ მიმდინარეობს Tomahawk-ის საკრუიზო რაკეტების განთავსება, თუმცა სანაცვლოდ რუსეთმა უნდა უზრუნველყოს გამჭვირვალობის ზომები საკუთარ ორ სარაკეტო ბაზაზე.

შეერთებული შტატები მზადყოფნას გამოთქვამს, დაიწყოს მოლაპარაკებები ბირთვული შეიარაღების კონტროლის ახალ შეთანხმებაზე.

ნატოს მიერ მომზადებული დოკუმენტში კიდევ უფრო განმტკიცებულია ღია კარის პოლიტიკის პრინციპები და ხაზგასმულია, რომ ყველა ქვეყანას აქვს უფლება აირჩიოს ალიანსები და დაცული უნდა იყოს "გარე ჩარევებისგან".

გარდა ამისა, საპასუხო წერილში, ნატო მოითხოვს, რომ ევროპაში უსაფრთხოების უზრუნველყოფისთვის, რუსეთმა თავისი ჯარები გაიყვანოს უკრაინიდან, საქართველოდან და მოლდოვიდან, სადაც ამ ქვეყნების თანხმობის გარეშე იმყოფებიან.

ნატო კიდევ ერთხელ აღნიშნავს, რომ არ სურს კონფრონტაცია, თუმცა თავის პრინციპებზე უარს არ იტყვის.

ამასთან, ჩრდილოატლანტიკური ალიანსი რუსეთს სთავაზობს სამხედრო წვრთნების შესახებ მეტ გამჭვირვალობასა და ინფორმაციის გაცვლას, ინციდენტების პრევენციის შესახებ კონსულტაციებს.