რუსეთ-უკრაინას შორის დაძაბულობის ფონზე, თურქეთის პრეზიდენტი რეჯებ თაიფ ერდოღანი უკრაინას ოფიციალური ვიზიტით ეწვია.

უკრაინაში გამგზავრებამდე ჟურნალისტებთან საუბრისას ერდოღანის თქმით, თურქეთი ორივე მხარეს მოუწოდებს დიალოგისკენ და დასძინა, რომ კრიზისი მშვიდობიანი გზით უნდა გადაწყდეს საერთაშორისო სამართლის საფუძველზე.

მან კიდევ ერთხელ დაადასტურა ანკარის მზადყოფნა, თავისი წვლილი შეიტანოს რეგიონში მშვიდობისა და ნდობის ატმოსფეროს დასამყარებლად.

მანამდე, ერდოღანი გამოდიოდა შეთავაზებით, რომ თურქეთი რუსეთსა და უკრაინას შორის დაძაბულობის შესამცირებლად შუამავლის როლს იკისრებდა.

უკრაინაში ვიზიტის ფარგლებში, ერდოღანი მოლაპარაკებებს გამართავს უკრაინის პრეზიდენტ ვოლოდიმირ ზელენსკისთან. მოსალოდნელია, რომ ჩინეთში ვიზიტის შემდეგ, რუსეთის პრეზიდენტი პუტინი ანკარაში ჩავა.

"ღმერთმა ქნას, წარმატებით გადავლახოთ ორ ქვეყანას შორის არსებული პრობლემური პერიოდი", - განაცხადა ერდოღანმა ვიზიტის დაწყებამდე.

ერდოღანმა ასევე განაცხადა, რომ თურქეთი ყურადღებით ადევნებს თვალყურს მიმდინარე მოვლენებს. მან ასევე აღნიშნა, რომ თურქეთი ყველა პლატფორმაზე ხაზგასმით აცხადებს უკრაინის ტერიტორიული მთლიანობისა და სუვერენიტეტისადმი მტკიცე მხარდაჭერას.

ზელენსკისთან შეხვედრის შემდეგ, მოსალოდნელია, რომ ერდოღანი დაესწრება უკრაინისა და თურქეთის ორმხრივი მაღალი დონის სტრატეგიული საბჭოს შეხვედრას.

გარდა ამისა, იგეგმება სხვადასხვა შეთანხმებებზე, მათ შორის თავისუფალი ვაჭრობის შესახებ შეთანხმებაზე ხელმოწერა და პრეზიდენტების ერთობლივი პრესკონფერენცია.

თურქეთი ტრადიციულად ცდილობს კარგი კავშირები ჰქონდეს როგორც უკრაინასთან, ასევე რუსეთთან, თუმცა რამდენიმე დღის წინ, ერდოღანმა განაცხადა, რომ უკრაინაში სამხედრო შეჭრის შემთხვევაში, ანკარა მოიქცევა ისე, როგორც ნატო-ს წევრი ქვეყანა.