რუსეთის ხელისუფლება გერმანულ საერთაშორისო სამაუწყებლო კომპანია Deutsche Welle-ს სანქციებს უწესებს. ამის შესახებ საუბარია განცხადებაში, რომელიც 3 თებერვალს რუსეთის საგარეო საქმეთა სამინისტროს ვებგვერდზე გამოქვეყნდა. კერძოდ, დაიხურება Deutsche Welle-ს საკორესპონდენტო ბიურო მოსკოვში, შეწყდება გერმანული სამაუწყებლო კომპანიის  თანამგზავრული და სხვა სახის მაუწყებლობა რუსეთის ტერიტორიაზე.

როგორც განცხადებაშია აღნიშნული, რუსეთის ხელისუფლება განიხილავს საკითხს „დოიჩე ველეს“ როგორც „უცხოეთის აგენტის“ ფუნქციის შემსრულებელ მედიასაშუალებად აღიარების შესახებ.

რუსეთის ხელისუფლებამ აღნიშნული გადაწყვეტილება გერმანიაში მარეგულირებელის მიერ რუსული გერმანულენოვანი ტელეარხის RT DE-ს მაუწყებლობის აკრძალვის საპასუხოდ მიიღო. მედიამარეგულირებლის განცხადებით, რუსულ ტელეარხს გერმანიაში ტრანსლირების ლიცენზია არ ჰქონდა.

ამასთან, რუსეთის საგარეო საქმეთა სამინისტროს განცხადებაში აღნიშნულია, რომ მოსკოვი შეადგენს გერმანიის მოქალაქეების სიას, რომლებსაც მისი აზრით,   RT DE-ის მაუწყებლობის შეწყვეტასთან კავშირი აქვთ და რუსულ სახელმწიფო არხზე ზეწოლას ახდენენ. მათ რუსეთში შესვლა აეკრძალებათ.