ლიეტუვის, ლატვიისა და ესტონეთის საგარეო საქმეთა მინისტრები, უკრაინაში რუსეთის შესაძლო შეჭრის გამო შეშფოთების ფონზე, კიევში ჩასასვლელად ემზადებიან, რათა მტკიცე მხარდაჭერა გამოუცხადან უკრაინასა და უკრაინელ ხალხს. ამის შესახებ ლიეტუვის საგარეო საქმეთა მინისტრმა, გაბრიელიუს ლანდსბერგისმა განაცხადა.

"ადრე შევთანხმდით კოლეგები ბალტიისპირეთის ქვეყნებიდან და ჯერჯერობით ჩვენი ვიზიტი დასტურდება უახლოეს მომავალში", - განაცხადა ლანდსბერგისმა.

მისი განცხადებით, საგარეო საქმეთა მინისტრების ასეთ ერთობლივ ვიზიტის ნატოსა და ევროკავშირის წევრი ქვეყნების სხვა მინისტრებიც თუ შეუერთდებიან, იქნება "ძალიან ძლიერი სიგნალი" და ამგვარი "პოლიტიკური ფარი" საშუალებას მოგვცემდა დრო მოგვეგო და გადაგვედო რუსეთის თავდასხმა, თუკი ასეთი რამ მართლაც არის დაგეგმილი.

ცოტა ხნით ადრე ცნობილი გახდა, რომ უკრაინას იტალიის საგარეო საქმეთა მინისტრი ლუიჯი დი მაიო, დიდი ბრიტანეთის საგარეო საქმეთა მდივანი ლიზ ტრასი და პოლონეთის სეიმის სპიკერი ტომაშ გროდსკი ეწვევიან.

სოლიდარობისა და მხარდაჭერის გამოხატვის მიზნით, უკრაინას არაერთი დასავლელი ლიდერი და პოლიტიკოსი ეწვია. ბოლო ხანებში უკრაინას სტუმრობდნენ ბრიტანეთის პრემიერ მინისტრი, საფრანგეთის პრეზიდენტი, გერმანიის კანცლერი, თურქეთის პრეზიდენტი, აშშ-ის სახელმწიფო მდივანი, ნიდერლანდებისა და პოლონეთის პრემიერ-მინისტრები, გერმანიისა და საფრანგეთის საგარეო საქმეთა მინისტრები, სლოვაკეთის, ჩეხეთისა და ავსტრიის საგარეო საქმეთა მინისტრები და ა.შ.