"ნაციონალური მოძრაობა" რუსთავში, პარლამენტის შუალედურ არჩევნებში ბადრი ჯაფარიძის კანდიდატურას დაუჭერს მხარს. ამის შესახებ ხატია დეკანოიძემ განაცხადა.

დეკანოიძის განცხადებით, "ნაციონალური მოძრაობა" არ დააყენებს თავის კანდიდატს რუსთავში.

"ნაციონალური მოძრაობა“ არ დააყენებს თავის კანდიდატს და მხარს დაუჭერს ბატონ ბადრი ჯაფარიძეს რუსთავში. ეს უნდა იყოს საერთო პლატფორმა; ვიზიარებთ იმას, რომ ეს უნდა იყოს ერთიანი ძალისხმევა და ვიზიარებთ, ვიაზრებთ იმას, რომ იქნება რთული ბრძოლა, ვინაიდან ნამდვილად, ხელისუფლება მთელი რესურსის მობილიზებას შეეცდება; მაგრამ ნამდვილად დასაფასებელია ბატონი ბადრის ეს გადაწყვეტილება, ამიტომ ერთობლივი ძალისხმევით გავაკეთებთ მაქსიმალურს", - განაცხადა დეკანოიძემ.

ამავდროულად, დეკანოიძემ კიდევ ერთხელ შეაფასა პარლამენტის მიერ ბადრი ჯაფარიძისთვის სადეპუტატო უფლებამოსილებს შეწყვეტის გადაწყვეტილება.

"ეს იყო მანდატის პოლიტიკური ქურდობა, რომ პარლამენტში ოპოზიცია არ იყოს ძლიერად წარმოდგენილი, არ გვქონდეს იმისი შესაძლებლობა, რომ საგამოძიებო კომისიები შევქმნათ", - თქვა დეკანოიძემ.

ბადრი ჯაფარიძის კანდიდატურის მხარდაჭერის მოწოდებით გამოვიდა საქართველოს მესამე პრეზიდენტი მიხეილ სააკაშვილი. მისი თქმით, ჯაფარიძეს მანდატი გაუუქმეს, რადგან ხელი შეშლოდა მისი წამების საქმეზე საგამოძიებო კომისიის შექმნას.

"ბადრი ჯაფარიძეს დაჩქარებულად მოუხსნეს დეპუტატის სტატუსი, ვინაიდან ის იყო ის 50-ე და გადამწყვეტი ხმა, რომელიც საჭირო იყო ჩემი წამების კომისიის შესაქმნელად.

ამიტომ, მე მის მიმართ განსაკუთრებული დამოკიდებულება მაქვს. მაგრამ ჩემს სუბიექტურ დამოკიდებულებაზე ბევრად მაღლა დგას ყველა ნამდვილი ოპოზიციური ჯგუფის ერთიანობის იდეა. არსად არავის მსოფლიოში არ დაუმარცხებია მაფიოზური რეჟიმები ყველას ერთიანობის გარეშე.

ამიტომ, მინდა მოვუწოდო ყველას, მხარი დაუჭიროს ბადრი ჯაფარიძის კანდიდატურას რუსთავში.

ოღონდ ყველას უნდა გვახსოვდეს, რომ ბათუმშიც და რუსთავშიც გამარჯვება ვერ მიიღწევა, თუ მანამდე ქვეყანაში არ იქნება დიდი ტალღა სიღატაკის, ძარცვის, უსამართლობის, დაცინვის წინააღმდეგ და ეს ტალღა იქნება აუცილებლად უმოკლეს ხანში!", - წერს მიხეილ სააკაშვილი.

შეგახსენებთ, პარლამენტმა სადეპუტატო უფლებამოსილება ბადრი ჯაფარიძეს 15 თებერვალს შეუწყვიტა.

2 აპრილს საქართველოს პარლამენტისა და მუნიციპალიტეტის საკრებულოს შუალედური არჩევნები გაიმართება.

შუალედური არჩევნები საქართველოს პარლამენტის და ბათუმის საკრებულოს გამოკლებული წევრების ასარჩევად ტარდება. პარლამენტი ნინო ლაცაბიძემ მას შემდეგ დატოვა, რაც რუსთავის მერად აირჩიეს, ხოლო ბათუმის საკრებულოს მაჟორიტარი წევრი ჯემალ ფუტკარაძე გარდაიცვალა.