უკრაინელი სამხედროები და რუსეთის მიერ მხარდაჭერილი სეპარატისტები ერთმანეთს დონბასში ცეცხლის შეწყვეტის რეჟიმის დარღვევაში ადანაშაულებენ. აღმოსავლეთ უკრაინაში, შეხების ხაზის გასწვრივ საარტილერიო ცეცხლი ეუთოს სადამკვირვებლო მისიამაც დააფიქსირა, იუწყება სააგენტო Reuters-ი დიპლომატიურ წრეებზე დაყრდნობით.

უკრაინის გაერთიანებული ძალების ოპერაციის შტაბში განაცხადეს, რომ დაბომბვა დონეცკისა და ლუგანსკის სეპარატისტული რეგიონებიდან განხორციელდა. შტაბის მონაცემებით, 17 თებერვალს დონეცკისა და ლუგანსკის ოლქებში ცეცხლის შეწყვეტის რეჟიმი 29-ჯერ დაფიქსირდა, მათ შორის 27-ჯერ გამოყენებული იყო მინსკის შეთანხმებით აკრძალული შეიარაღება. შტაბისვე ინფორმაციით, დაიჭრა ერთი უკრაინელი სამხედრო. წინასწარი ინფორმაციით, დაჭრლია ორი სამოქალაქო პირიც.

„რუსეთის საოკუპაციო ძალებმა განსაკუთრებული ცინიზმით განახორციელეს სტანიცა ლუგანსკაიას დასახლებული პუნქტის დაბომბვა“, - აღნიშნულია ინფორმაციაში.

უკრაინელი სამხედროების თქმით, მოწინააღმდეგემ ისროლა 32 ჭურვი მძიმე საარტილერიო შეიარაღებიდან, დააზიანეს საბავშვო ბაღის შენობა, სადაც იმ დროს ბავშვები იმყოფებოდნენ, ასევე დაზიანდა საზოგადოებრივი ინფრასტრუქტურა, დასახლებული პუნქტი ელეტქროენერგიის გარეშე დარჩა.

ამასთან, სეპარატისტები სიტუაციის გამწვავებაში უკრაინის შეიარაღებულ ძალებს ადანაშაულებენ. მათი თქმით, უკრაინელმა სამხედროებმა ოთხჯერ დაარღვიეს ცეცხლის შეწყვეტის რეჟიმი, ისროდნენ „სხვადასხვა ტიპის ყუმბარმტყორცნებიდან, ტყვიამფრქვევებიდან და მცირე იარაღიდან“, - ნათქვამია  სეპარატისტების ინფორმაციაში. მათი თქმით, იძულებულები იყვნენ „გაეხსნათ საპასუხო ცეცხლი მოწინააღმდეგის  ცეცხლის ჩასახშობად“.