შეერთებული შტატების პრეზიდენტმა ჯო ბაიდენმა უკრაინასთან დაკავშირებით ეროვნული უსაფრთხოების საბჭოს სხდომა მოიწვია. ინფორმაციას თეთრი სახლი ავრცელებს.

პრეზიდენტის ადმინისტრაციის ცნობით, პრეზიდენტი უკრაინაში სიტუაციის განვითარებას თვალყურს ადევნებს და ეროვნული უსაფრთხოების გუნდი მას რეგულარულად აწვდის განახლებულ ინფორმაციას აღნიშნულ საკითხზე.

თეთრი სახლის განცხადებით, ეროვნული უსაფრთხოების გუნდი კიდევ ერთხელ ადასტურებს, რომ რუსეთს ნებისმიერ დროს შეუძლია შეტევა უკრაინაზე.

"პრეზიდენტმა მიიღო განახლებული ინფორმაცია მიუნხენის კონფერენციაზე, ვიცე-პრეზიდენტის, უკრაინის პრეზიდენტ, ვოლოდიმირ ზელენსკის, ევროპული კომისიის პრეზიდენტ ფონ დერ ლაიენის, ნატოს გენერალურ მდივან სტოლტენბერგის, ბალტიისპირეთის ქვეყნების ლიდერების, გერმანიის კანცლერ შოლცის, საბერძნეთის პრემიერ მიცოტაკისისა და სხვადასხვა ალიანსისა და პარტნიორების შეხვედრების შესახებ. უკრაინაში არსებულ ვითარებასთან დაკავშირებით, პრეზიდენტი ეროვნული უშიშროების საბჭოს მოიწვევს“, - აღნიშნულია განცხადებაში.