ლიეტუვისა და პოლონეთის პრეზიდენტები, გიტანას ნაუსედა და ანდჟეი დუდა გამოდიან მოწოდებით, უკრაინამ მიიღოს ევროკავშირის წევრობის კანდიდატი ქვეყნის სტატუსი. ამის შესახებ ნათქვამია ლიეტუვის, პოლონეთისა და უკრაინის პრეზიდენტების ერთობლივ დეკლარაციაში, რომელიც კიევში გაფორმდა.

პრეზიდენტებმა მკაცრად დაგმეს რუსეთის გადაწყვეტილება უკრაინის დროებით ოკუპირებულ ტერიტორიებზე სეპარატისტული ერთეულების, ლუგანსკისა და დონეცკის "რესპუბლიკების" აღიარების შესახებ.

"რუსეთმა მიზანმიმართულად და ცალმხრივად დატოვა მინსკის შეთანხმებები და მას ეკისრება სრული პასუხისმგებლობა ადგილზე უსაფრთხოების ვითარების შემდგომ გაუარესებაზე", - ნათქვამია დეკლარაციაში.

ლიეტუვისა და პოლონეთის პრეზიდენტებმა განაცხადეს, რომ დგანან უკრაინის გვერდზე და მხარს უჭერენ მის ძალისხმევას კონფლიქტის დიპლომატიური და მშვიდობიანი გზით მოგვარების მიზნით.

"უკრაინა იმსახურებს ჩვენს მტკიცე მხარდაჭერას მისი ევროპული და ევროატლანტიკური მისწრაფებების მიმართ, რაც უკრაინელი ხალხის ნებასა და არჩევანს ეფუძნება. ლიეტუვა და პოლონეთი ადასტურებენ უკრაინის ევროპული პერსპექტივის მხარდაჭერას", - აღნიშნულია დეკლარაციაში.

"ხაზს ვუსვამთ, რომ ასოცირების შეთანხმებისა და შიდა რეფორმების განხორციელებაში მნიშვნელოვანი პროგრესის გათვალისწინებით, ასევე უსაფრთხოების არსებული გამოწვევების გათვალისწინებით, უკრაინა იმსახურებს ევროკავშირის წევრის კანდიდატის სტატუსს და ლიეტუვა და პოლონეთი მხარს დაუჭერენ უკრაინას ამ მიზნის მიღწევაში", - ნათქვამია დეკლარაციაში.

ამავდროულად, პრეზიდენტებმა მოუწოდეს საერთაშორისო თანამეგობრობას, გადამწყვეტი ნაბიჯები გადადგას უკრაინის სუვერენიტეტისა და ტერიტორიული მთლიანობის წინააღმდეგ განხორციელებული აგრესიის მორიგი აქტის საპასუხოდ.