შეერთებული შტატების პრეზიდენტმა ჯო ბაიდენმა საგანგებო პრესკონფერენცია გამართა, სადაც რუსეთის წინააღმდეგ სანქციების მორიგი პაკეტის დაწესების შესახებ განაცხადა.

პრეზიდენტ ბაიდენის განცხადებით, შეერთებული შტატები მოკავშირეებთან ერთად გეგმავს, რუსეთს ეკონომიკას დააკისროს სერიოზული საფასური, როგორც დაუყოვნებლივ, ასევე დროთა განმავლობაში.

"ჩვენ მიზანმიმართულად შევიმუშავეთ ეს სანქციები რუსეთზე გრძელვადიანი ზემოქმედების მაქსიმალურად გაზრდისა და შეერთებულ შტატებსა და მოკავშირეებზე ზემოქმედების შესამცირებლად", - თქვა ბაიდენმა და დასძინა, რომ ვაშინგტონი ამას მარტო არ აკეთებს.

ბაიდენის თქმით, აშშ შეაფერხებს რუსეთის შესაძლებლობას, დააფინანსოს თავისი არმია.

"დღეს ჩვენ დავაწესებთ სანქციებს რუსული ბანკების წინააღმდეგ, რომლებიც 1 ტრილიონი დოლარის ოდენობის აქტივებს ფლობენ. სანქციებს ვუწესებთ ოთხ რუსულ ბანკს, მათი ყველა აქტივი ამერიკაში გაიყინება. მათ შორის არის VTB, სიდიდით მეორე ბანკი რუსეთში, რომელიც 250 მილიარდი დოლარის აქტივებს ფლობს", - თქვა ბაიდენმა.

აშშ-ის პრეზიდენტის თქმით, დაპირებისამებრ, სანქცირებულთა სიაში არიან რუსეთის ელიტისა და მათი ოჯახის წევრები, რომლებიც პირად სარგებელს იღებენ კრემლის პოლიტიკისგან.

ამავდროულად, ბაიდენმა აღნიშნა, რომ ამერიკელი სამხედროები უკრაინაში არ იომებენ, თუმცა ვაშინტონი, ალიანსის მოკავშირეებთან ერთად, დაიცავს ნატოს ტერიტორიის თითოეულ სანტიმეტრს.

ბაიდენის ამ განცხადებას წინ უსწრებდა "დიდი შვიდეულის" ლიდერების შეხვედრა, სადაც რუსეთის წინააღმდეგ სანქციების თაობაზე იმსჯელეს.

მანამდე, ბრიტანეთმა რუსეთის წინააღმდეგ სანქციების დაწესების შესახებ განაცხადა.

შეგახსენებთ, 22 თებერვალს ბაიდენმა ბაიდენმა ლუგანსკისა და დონეცკის სეპარატისტულ რესპუბლიკებს სანქციები დაუწესა, იმავე დღეს, ვაშინგტონმა რუსეთის წინააღმდეგ მორიგი სანქციები დააწესა. 23 თებერვალს, ბაიდენის განკარგულებით, სანქციები დაუწესდა რუსული გაზსადენის "ჩრდილოეთის ნაკადი 2"-ის ოპერატორ კომპანიას.