კიევში, რუსული საფრენი აპარატის ჩამოგდების შედეგად ცხრასართულიან საცხოვრებელ კორპუსს ცეცხლი გაუჩნდა, ადგილზე სახანძრო-სამაშველო სამსახური მუშაობს.

შინაგან საქმეთა მინისტრის მრჩეველის, ანტონ გერაშენკოს განცხადებით, შესაძლოა, იყოს მსხვერპლი.

უკრაინის შინაგან საქმეთა სამინისტროს ინფორმაციით, კიევში რუსული საფრენი აპარატი ჩამოაგდეს.

„ჩვენმა ჰაერსაწინააღმდეგო სისტემამ მტრის საფრენი აპარატი ჩამოაგდო, რომელიც დარნიცკისრაიონში სახლთან ახლოს, კოშიცას ქუჩაზე ჩამოვარდა“, – ნათქვამია უკრაინის შსს-ს განცხადებაში.

უკრაინის დედაქალაქზე რუსმა ოკუპანტებმა გამთენიისას სარაკეტო შეტევა განახორციელეს. არსებული ინფორმაციით, კიევში, ტროეშინის რაიონში 6 აფეთქება მოხდა. აფეთქებების ხმა ისმოდა დედაქალაქის პეჩერსკის და გოლოსევსკის რაიონებში, პოზნიაკიში. შს მინისტრის მოადგილის ანტონ გერაშენკოს ცნობით, სავარაუდოდ, გამოყენებული იქნა ბალისტიკური რაკეტები.