მართლა გაუგებარია, რა გახდა უკრაინის ელჩის გაწვევის მიზეზი, გვინდა, გავიგოთ, რით არიან უკმაყოფილო, ეს თუ მოხალისეების გაგზავნას ეხება, საქართველო მათ ხელს არ უშლის, – განაცხადა ჟურნალისტებთან საუბრისას პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ.

"ეს გადაწყვეტილება მოულოდნელი იყო. ჩვენი მხრიდან კითხვები არის შემდეგში – რა მიზეზით არის გაწვეული ელჩი მაშინ, როცა ანალოგიური განცხადება გააკეთა ბევრმა სახელმწიფომ, მათ შორის მოლდოვამ, ისრაელმა, რომლებიც ახლო პარტნიორები არიან უკრაინის და მათ მიმართ ასეთი კომუნიკაცია არ ყოფილა. შესაბამისად, მართლა გაუგებარია, რა გახდა ამის მიზეზი. დიპლომატიურ ენაზე ელჩის გაწვევა ნიშნავს, რომ რაღაცით ქვეყანა უკმაყოფილოა. შესაბამისად, ჩვენც გვინდა გავიგოთ, რითია უკმაყოფილო – თუ ეს მოხალისეების გაგზავნას ეხება, საქართველო მოხალისეების გაგზავნას ხელს არ უშლის. თუ ვინმეს სურს წასვლა, მას შეუძლია, აიღოს ბილეთი და წავიდეს, თუმცა სახელმწიფო მებროლებს არ გააგზავნის, რადგან ეს იქნება ჩვენი მხრიდან ომში ჩართვა და ოკუპირებული ქვეყნისთვის, რომლის 20 პროცენტი ოკუპირებულია და რუსეთის ჯარი დგას თბილისიდან 30 კილომეტრში და ცენტრალური მაგისტრალიდან 400 მეტრში, ამ ომში ჩართვა იქნება დამანგრეველი. შესაბამისად, ჩვენ ვაკეთებთ ყველაფერს, რომ საქართველო ამ ომში არ იყოს ჩართული“, – განაცხადა ნიკოლოზ სამხარაძემ.