აშშ-ის კონგრესის წარმომადგენელთა პალატისა და სენატის დეპუტატთა ორპარტიულმა ჯგუფმა წარადგინა კანონპროექტი, რომელიც კრძალავს რუსული ნავთობის, ნავთობპროდუქტების, თხევადი ბუნებრივი აირისა და ნახშირის შეერთებულ შტატებში იმპორტს.

ეს ნაბიჯი მიზნად ისახავს რუსეთის პრეზიდენტის ვლადიმერ პუტინის შემოსავლის მნიშვნელოვანი წყაროს შეწყვეტას უკრაინაში შეჭრის გადაწყვეტილების შემდეგ.

კანონპროექტის ინიციატორები არიან რესპუბლიკელი სენატორი ლიზა მურკოვსკი და დემოკრატი სენატორი ჯო მანჩინი. მათი განცხადებით, კანონპროექვს მხარს უჭერენ ორივე პარტიასა და კონგრესის ორივე პალატაში.

"ეს ნიშნავს, რომ კანონპროექტს აქვს მომავალი", - თქვა მურკოვსკიმ, სენატის ენერგეტიკისა და ბუნებრივი რესურსების კომიტეტის წამყვანს რესპუბლიკელმა წევრმა.
ჯო მანჩინი ამ კომიტეტის თავმჯდომარეა.

"ჩვენ აღარ გავგზავნით დოლარებს რუსეთში, რათა დავეხმაროთ მათ უდანაშაულო ადამიანების მოკვლაში", - თქვა მურკოვსკიმ პრესკონფერენციაზე. "ეს კანონპროექტი ამას გააკეთებს."

ჟურნალისტების კითხვებზე პასუხად, თუ რა გავლენას მოახდენს ამერიკელი მომხმარებლებისთვის ბენზინის ფასების ზრდა, მანჩინმა თქვა, რომ სიამოვნებით გადაიხდის 10 ცენტს მეტს ერთ გალონზე უკრაინელების დასახმარებლად. "ეს ომია", - დასძინა მან.

კანონპროექტი ასევე მოითხოვს საგანგებო მდგომარეობის გამოცხადებას, რადგან რუსეთის თავდასხმა უკრაინაზე საფრთხეს უქმნის აშშ-ის უსაფრთხოებას, საგარეო პოლიტიკას და ეკონომიკას.

საგანგებო მდგომარეობის მოქმედების პერიოდში, აშშ-ში რუსული ნავთობის, ნავთობპროდუქტების, თხევადი ბუნებრივი აირისა და ქვანახშირის იმპორტი აიკრძალება.
გამონაკლისი შეეხება იმ საქონელს, რომელიც კანონის ძალაში შესვლის დროისთვის, უკვე გზაშია ან იტვირთება.

რესპუბლიკელი სენატორი ლინდსი გრემის განცხადებით, რომელიც კანონპროექტის კიდევ ერთი თანასპონსორია, თუ სხვა ქვეყნებიც აკრძალავენ რუსული ნავთობის იმპორტი, ეს იქნება დამანგრეველი დარტყმა პუტინისთვის.

"იმედი მაქვს, რომ დროთა განმავლობაში მსოფლიო მიჰყვება ჩვენს მაგალითს", - თქვა მან.

წარმომადგენელთა პალატის სპიკერმა ნენსი პელოსიმ განაცხადა, რომ იგი მხარს უჭერს რუსული ნავთობის იმპორტის აკრძალვას.