უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა, რომ უკრაინის ქალაქების ოკუპაცია დროებითია და მოსახლეობას მოუწოდა განდევნონ რუსი სამხედროები ქვეყნიდან. 

მან აღნიშნა, რომ როდესაც შენი ქალაქი ოკუპირებულია, პროტესტი განსაკუთრებული გმირობაა.

„როდესაც არ გაქვს იარაღი, გესვრიან და შენ არ გარბიხარ, როდესაც არ გაქვს ჯავშანი და ჯავშანტრანსპორტიორი გიახლოვდება და შენ არ გარბიხარ. ამიტომ ოკუპაცია დროებითია!“ - თქვა ზელენსკიმ.

„ჩვენი ხალხი, ჩვენი უკრაინელები უკან არ იხევენ. არ ნებდებიან. არ წყვეტენ წინააღმდეგობას. ისინი უყვირიან ოკუპანტებს - წადი სახლში. როგორც რუსი ხომალდი! დევნიან მათ ჩვენი ტერიტორიიდან. გზას უღობავენ... უკრაინული მიწის ყოველი მეტრი გამოხსნილია პროტესტებითა და ოკუპანტების დამცირებით, ეს არის ნაბიჯი  გამარჯვებისკენ, ეს არის სიცოცხლის შანსი“, - განაცხადა ზელენსკიმ.

პრეზიდენტმა მოქალაქეებს მოუწოდა ყველა ქალაქში, სადაც მეტრი შევიდა, შეტევაზე გადავიდნენ.

„გამოდით ქუჩებში! იბრძოლეთ! ყველგან, სადაც შეძლებთ. როგორც ხერსონში, როგორც ბერდიანსკში, როგორც მელიტოპოლში. როგორც კონოტოპში. გამოდით და განდევნეთ ეს ბოროტება ჩვენი ქალაქებიდან“, - თქვა ზელენსკიმ.

მან ასევე აღნიშნა, რომ აუცილებელია არ დაუშვან ახალი „დონეცისა და ლუგანსკის რესპუბლიკების“ გაჩენა, სადაც ნორმალური ცხოვრება შეუძლებელია, სადაც არის მხოლოდ მონობა და მუხლებზე დაჩოქება.