დღეს, რუსეთში, უკრაინაში ომის საწინააღმდეგო აქციებზე 4 359 ადამიანი დააკავეს. ინფორმაციას უფლებადამცველები ავრცელებენ. მათივე ინფორმაციით, აქციები რუსეთის 56 ქალაქში გაიმართა.

რუსული მედია კი შინაგან საქმეთა სამინისტროზე დაყრდნობით წერს, რომ საპროტესტო აქციებში რუსეთის მასშტაბით 5 200-მდე ადამიანმა მიიღო მონაწილეობა. მოსკოვში უკრაინაში ომი 2 500-მა ადამიანმა გააპროტესტა, დააკავეს 1 700, პეტერბურგში აქციებზე 1 500 კაცი გამოვიდა, მათ შორის დაკავებულია 750. სხვა ქალაქებში საერთო ჯამში აქციებში მონაწილეობა მიიღო 1 200-მა ადამიანმა, მათ შორის დაკავებულია 1 061 პროტესტანტი.

მოქალაქეებს აქციებში მონაწილეობისაკენ ოპოზიციონერი ალექსეი ნავალნის გუნდის წევრები მოუწოდებენ. 4 მარტს ვლადიმირ პუტინმა ხელი მოაწერა კანონს, რომლის თანახმად, „რუსეთის ინტერესების დასაცავად“ რუსული ჯარის გამოყენების წინააღმდეგ მოწოდებისთვის მოქალაქეებს სისხლის სამართლის პასუხისმგებლობა დაეკისრებათ.