უკრაინაში, რუსეთის აგრესიის დაწყებიდან დაღუპულია 41 და დაჭრილია 76 ბავშვი. ამის შესახებ უკრაინის სახალხო დამცველმა ლუდმილა დენისოვამ განაცხადა.

„ხარკოვიდან სამართალდამცველებმა კიდევ 300 ადამიანი გამოიყვანეს. გადარჩენილთა შორის არის დედა სამ შვილთან ერთად, რომლებსაც ღამით რუსული არტილერია ბომბავდა. დაბომბვის შედეგად დაშავდა მისი ერთ-ერთი შვილი. ასევე პოლიციელებთან საუბრისას ქალმა განაცხადა, რომ მათ თვალწინ დაიღუპა მეზობლის ბავშვი. ქალაქ დერგაჩიში, ხარკოვის ოლქში რუსულმა არმიამ დაბომბა დერგაჩევის მე-3 ლიცეუმი და ქალაქის საცხოვრებელი უბნები. დაიღუპა სულ მცირე სამი და დაიჭრა 15 ადამიანი, მათ შორის 4 წლის ბავშვი“, - აღნიშნა დენისოვამ.

ასევე, სახალხო დამცველის თქმით, დღეს დილით დონეცკის ოლქში დაიჭრა 4 სამოქალაქო პირი, მათ შორის 14 წლის ბიჭი.

ამ დრომდე ვერ ხერხდება მარიუპოლსა და ვოლნოვახაში დაღუპულებისა და დაჭრილების რაოდენობის დადგენა. ეს ქალაქები ბლოკირებულია რუსეთის საოკუპაციო ძალების მიერ.

დენისოვას თქმით, ოკუპანტებმა ისევ დაბომბეს ნიკოლაევის მშვიდობიანი მოსახლეობა, ასევე მტერი აგრძელებს სკოლებისა და საბავშვო ბაღების დაბომბვას.

„ოკუპანტებმა დაბომბეს ქალაქის სამხრეთ ნაწილში ბალაბანოვკის საცხოვრებელი მიკრორაიონი. დაინგრა 60 სახლი. მტერმა უმეტესად გამოიყენა კასეტური ბომბები.

ასევე, ოკუპანტებმა ხარკოვში დაბომბეს 30 სკოლა. 27 საბავშვო ბაღი, 5 უმაღლესი სასწავლებელი და ბავშვთა პანსიონები“, - განაცხადა დენისოვამ.