ტყვედ ჩავარდნილმა რუსმა მფრინავმა მაქსიმ კრიშტოპმა პრესკონფერენციაზე განაცხადა, რომ უკრაინის ტერიტორიაზე სამი გაფრენა განახორციელა და ერთ-ერთი გაფრენის დროს საცხოვრებელ სახლზე 4 ტონა ფუგასური ბომბები ჩამოყარა.

„ჩემი მესამე საბრძოლო გაფრენა 6 მარტს შევასრულე. ბორტზე 4 ტონა ფუგასური საავიაციო ბომბები იყო. საბრძოლო დავალების შესრულების დროს მივხვდი რომ მიზანს წარმოადგენად მოწინააღმდეგის არა სამხედრო ობიექტები, არამედ საცხოვრებელი სახლები და მშვიდობიანი მოსახლეობა. მაგრამ დანაშაულებრივი ბრძანება მაინც შევასრულე. ამის შემდეგ ჩამომაგდო უკრაინის საჰაერო თავდაცვის სისტემამ და ტყვედ ჩავვარდი“, -თქვა რუსმა პილოტმა.

მისი თქმით, მფრინავებს ნაბრძანები ჰქონდათ 24 თებერვლიდან უკრაინის ტერიტორიაზე ავიადარტყმების მიყენება.

მან პირველი საბრძოლო გაფრენა 24 თებერვალს შეასრულა. კრიშტოპმა ჩამოყარა 3 ტონა ფუგასური საავიაციო ბომბები უკრაინის ძალების წინააღმდეგ სამხრეთ ბალაკლეაზე. მისივე თქმით, მიზანი გაანადგურა.

მეორე საბრძოლო გაფრენა ოკუპანტმა 3 მარტს შეასრულა და 3 ტონა ფუგასური ჭურვებით იზიუმთან უკრაინის ძალების ჯავშანტექნიკის კოლონა დაბომბა. კრიშტოპის თქმით, ეს მიზანიც გაანადგურა.

ოკუპანტის თქმით, მას ხელმძღვანელობამ ჯერ კიდევ იანვარში აცნობა, რომ უკრაინაში საბრძოლო მოქმედებებში მიიღებდნენ მონაწილეობას და წვრთნების საფარქვეშ თავდასხმისთვის ემზადებოდნენ.   

რუსმა დამპყრობელმა აღიარა, რომ ჩაიდინა საშინელი დანაშაულები, ბოდიში მოიხადა და პირობა დადო, რომ ყველაფერს იღონებს, რათა ომი რაც შეიძლება სწრაფად დამთავრდეს და ყველა დამნაშავემ პასუხი აგოს.

მან რუს ჯარისკაცებს მოუწოდა არ შეასრულონ დანაშაულებრივი ბრძანებები და შეწყვიტონ ომი მშვიდობიანი მოსახლეობის წინააღმდეგ.

„ვფქირობ, რომ ეს ომი ჩვენ უკვე წავაგეთ“, - განაცხადა რუსმა ოკუპანტმა.