რუსეთის სამხედრო სარდლობა უკრაინაში საბრძოლო მოქმედებებში ჩასართავად ოკუპირებული აფხაზეთიდან და ე.წ. სამხრეთ ოსეთიდან დაქირავეული მებრძოლების ჩაყვანას გეგმავს. ასევე მებრძოლების მობილიზება დაიწყო ოკუპირებული დონეცკისა და ლუჰანსკის ოლქებიდან.

ინფორმაციას უკრაინის შეიარაღებული ძალების გენშტაბი ავრცელებს.

„რუსეთის შეიარაღებული ძალების სარდლობა პირადი შემადგენლობის დიდი დანაკარგისა და სარეზერვო ქვედანაყოფებისა და დანაყოფების დაკომპლექტებასთან დაკავშირებული პრობლემების გამო გეგმავს უკრაინის ტერიტორიაზე საბრძოლო მოქმედებებში ჩართოს ე.წ.წვევამდელები დონეცკისა და ლუჰანსკის ოლქების ტერიტორიებიდან და დაქირავებული მებრძოლები ოკუპირებული აფხაზეთიდან და სამხრეთ ოსეთიდან, ასევე პატიმრები რუსეთის სასჯელაღსრულების დაწესებულებებიდან“, - ნათქვამია ინფორმაციაში.

ამასთან, აღნიშნულია რომ უკრაინის ტერიტორიაზე მყოფი ოკუპანტების მორალურ-ფსიქოლოგიური მდგომარეობა, უკიდურესად დაზიანებულია.

გენშტაბის მონაცემებით, რუს დამპყრობლებს შორის დაფიქსირდა დეზერტირობის მცდელობები.

მისივე ცნობით, რუსეთის საოკუპაციო ძალებში არსებობს ლოჯისტიკური პრობლემები. იმის გამო რომ არ ხდება ოკუპანტების ლოჯისტიკური უზრუნველყოფა, რუსმა სამხედროებმა დაიწყეს მოროდიორობა და დაპყრობილ ტერიტორიებზე ადგილობრივი მოსახლეობის, მაღაზიებისა და  აფთიაქების ძარცვა.