უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინისა და ევროპის ენერგეტიკული სისტემების გაერთიანების პროცესი დასრულდა.

ზელენსკის განცხადებით, ამერიდან, უკრაინა "ენერგეტიკული ევროკავშირის" წევრი გახდა.

"ახლა ჩვენი ელექტროენერგია მიედინება ევროკავშირში, ხოლო ევროპული ელექტროენერგია უკრაინაში", - თქვა ზელენსკიმ.

მან მადლობა გადაუხადა ევროკავშირის ხელმძღვანელობას, კერძოდ, ევროკომისიის პრეზიდენტ ურსულა ფონ დერ ლაიენს და ევროკომისარს ენერგეტიკის საკითხებში კადრი სიმსონს და ყველას, "ვისი წყალობითაც ჩვენ გვაქვს ერთიანი ენერგეტიკული სისტემა".

უკრაინაში ევროკავშირის ელჩმა მატი მაასიკასმა განაცხადა, რომ არა მხოლოდ უკრაინის, არამედ მოლდოვის ელექტროქსელებიც სინქრონიზებულია კონტინენტური ევროპის ქსელებთან.

"ისინი მთლიანად გათიშული არიან რუსეთის სისტემისგან", - დაწერა მაასიკასმა ტვიტერზე.

აღნიშნულ ინფორმაციას გამოეხმაურა ევროკომიიის პრეზიდენტი ურსულა ფონ დერ ლაიენი.

"უკრაინა, მოლდოვა და ევროპა: საერთო ღირებულებები, საერთო ენერგია და სოლიდარობა. მივესალმები დღეს გადადგმულ მნიშვნელოვან ნაბიჯს, რომელიც მიმართულია ამ ბნელ დროს სახლებში სითბოს, სინათლის შენარჩუნებისკენ უკრაინისა და მოლდოვის ელექტროქსელების ევროკავშირის ელექტროქსელებთან სინქრონიზებით. ჩვენ გავაგრძელებთ მათი ენერგოსისტემების სტაბილიზებაზე მუშაობას", - წერს ურსულა ფონ დერ ლაიენი.