მარიუპოლი შიშის, სიკვდილისა და საშინელებათა ქალაქია. ამის შესახებ Facebook-ზე წერს მარიუპოლელი კრისტინა ჯოლოსი, რომელმაც რუსი ტერორისტების მიერ ბლოკირებული ქალაქიდან გაღწევა მოახერხა.

ჯოლოსი წერს, რომ მარიუპოლში არ უშვებენ ჰუმანიტარულ ტვირთს. მოქალაქეებს მარიუპოლის დატოვება ცეცხლის ქვეშ უწევთ, ერთიანდებიან კოლონებად და ავტომობილებს აკრავენ წარწერას - „ბავშვები“.

 „ქალაქში არ არის კავშირი, წყალი, გაზი, სასწრაფო დახმარების ბრიგადები, ადამიანები ეზოებში მოგლეჯილი კიდურებიდან სისხლისგან იცლებიან და ვერავინ ეხმარება. ისინი მშვიდობიანი ადამიანები არიან, ჩვენი და თქვენი ნაცნობები, ნათესავები. დაღუპულებს ადგილზევე მარხავენ, მერე კი ოჯახის წევრები ვეღარ პოულობენ. ეს ხშირად ხდება -  წყლის ძებნის დროს, რიგებში ან ცეცხლზე წვნიანის მომზადებისას“, - წერს ქალი.

მისი თქმით, ქალაქის მოსახლეობა აგროვებს თოვლს, ადნობს ცეცხლზე და ასე ამზადებს მაკარონს.

„ჩემი ოჯახი გიმნაზიის თავშესაფარში იმყოფებოდა, სამი დღის წინ იქ ჭურვი ჩავარდა, ჩაისმხვრა ფანჯრები, ერთი ქალი ბარძაყში დაიჭრა ნამსხვრევებისგან, მთელი ღამე იწვა გიმნაზიის პირველ სართულზე და საწამლავს ითხოვდა, რომ ტკივილი არ ეგრძნო. საავადმყოფოში ვერავინ წაიყვანდა,“- წერს კრისტინა.

ის ამბობს, რომ ქალაქში დარნენ დედამისი, სამი ძმა, დედამთილი და მამათილი. კრისტინა წერს, რომ მარიუპოლში თითქმის აღარ არის თავშესაფრები და ქალაქიდან ხალხის დაიყოვნებლივ გამოყვანაა საჭირო.

 „ხალხი უნდა გამოვიყვანოთ, ქალები, ბავშვები. მოხუცები. გაგზავნეთ ავტობუსები, შეთანხმდით მწვანე დერეფნებზე!! ვლოცულობ ახლობლებისთვის, ყოველი მარიუპოლელისთვის და უკრაინელი ჯარისკაცებისთვის. მტერი ჩვენთან მოვიდა და არჩევანი არ დაგვიტოვა, მაგრამ ადამიანის სიცოცხლეზე ღირებული არაფერია. ეს უნდა დამთავრდეს!!!!!!“, - წერს კრისტინა.

მისი თქმით, მაღაზიები და აფთიქები გაძარცვულია, ადამიანებს წყალი და საკვები არ აქვთ. დაღუპულების ცხედრები არ გააქვთ და მოსახლეობას ეუბნებიან, რომ ფანჯრები გააღონ და აივანზე გაიტანონ- შემდეგ კი სამლოცველოებში.

 „არ ვიცი შემდეგ რა იქნება, ვლოცულობ, რომ ეს აღარასდროს განმეორდეს უკრაინის არც ერთ ქალაქსა და მსოფლიოში, არც ერთ ოჯახში. გოგონა, რომელმაც ბავშვი გააჩინა საავადმყოფოში, რომელსაც ბომბი დაეცა, ორსული, რომელიც იმავე საავადმყოფოში გარდაიცვალა, ისე, რომ ვერც მოასწრო სიცოცხლის ჩუქება {ბავშვისთვის}, დედები, რომლებიც შიშისგან კანკალებენ და შვილებს იფარავენ... მოხუცი, რომელსაც გადარჩენის შანსი აღარ დარჩენია, დაჭრილი მშვიდობიანი ადამიანები, რომლებიც ქუჩის ბრძოლების შედეგად იღუპებიან“, - წერს კრისტინა.

შეგახსენებთ, გუშინ, 16 მარტს რუსეთის არმიამ მარიუპოლის დრამატული თეატრის შენობა დაბომბა, სადაც 1200-მდე მშვიდობიანი მოქალაქე აფარებდა თავს.