ლატვიამ და ესტონეთმა სამ-სამი, ლიეტუვამ კი ოთხი რუსი დიპლომატის გაძევების გადაწყვეტილება მიიღეს. ინფორმაცის უკრაინული მედია ავრცელებს.

ლიეტუვის საგარეო საქმეთა სამინისტრომ აღნიშნული გადაწყვეტილება უკრაინისადმი სოლიდარობის ნიშნად მიიღო.

„ლიეტუვა მოუწოდებს რუსეთს დაუბრუნდეს საერთაშორისო სამართლის ნორმებს, შეწყვიტოს სისხლისმღვრელი ომი და მოსახლეობის ტანჯვა, გაიყვანოს უკრაინის ტერიტორიის ოკუპირებული მიწებიდან თავისი ჯარები“, - განაცხადეს უწყებაში.

თავის მხრივ ესტონეთის საგარეო საქმეთა სამინისტროს ვიცეკანცლერმა პოლიტიკურ საკითხბეში რეინ ტამსაარმა რუსეთის ელჩს დიპლომატიური ნოტა გადასცა და აღნიშნა, რომ დიპლომატების საქმიანობა ეწინააღმდეგებოდა ვენის კონვენციას დიპლომატიური ურთიერთობების შესახებ. დიპლომატებმა ესტონეთი 72 საათში უნდა დატოვონ.

ესტონეთის წარმომადგენლის განცხადებით, სამივე დიპლომატი უშუალო და აქტიურ მონაწილეობას იღებდა ესტონეთის უსაფრთხოებისთვის ძირის გამოთხრაში, პროპაგანდის გავრცელებასა და ამართლებდა რუსეთის აგრესიას უკრაინაში. ტამსაარმა რუსეთის ელჩი კიდევ ერთხელ დაარწმუნა, რომ ესტონეთი ურყევად უჭერს მხარს უკრაინის სუვერენიტეტსა და ტერიტორიულ მთლიანობას და მომავალშც გამოიყენებს ყველა საშუალებას უკრაინის მხარდასაჭერად.

გარდა ამისა, ლატვიის საგარეო საქმეთა მინისტრმა ედგარ რინკევიჩმა მიიღო გადაწყვეტილება რუსი დიპლომატების გაძევებასთან დაკავშირებით.

„გადაწყვეტილება მიღებულია ურაინაში რუსეთის აგრესიისა და ამ პირების მიერ დიპლომატის სტატუსის გამოყენებით თავიანთი საქმიანობის გამო. ეს არის ბალტიის ქვეყნების კოორდინირებული ქმედება“, - განაცხადა მან.

შეგახსენებთ, ბულგარეთის საგარეო საქმეთა სამინისტრომ 10 რუსი დიპლომატი გააძევა. მანამდე ქვეყნის დატოვება სამ რუს დიპლომატს მოსთხოვა სლოვაკეთმაც.