საქართველოს ჯანდაცვის სამინისტროს ინფორმაციით, "კოვიდ-19“-ის სამკურნალო პრეპარატ "პაქსლოვიდის" პირველი პარტია საქართველოში უკვე ჩამოიტანეს.

უწყების ცნობით, საქართველო პირველი ქვეყანაა რეგიონში, სადაც "კოვიდ-19"-ის სამკურნალო მედიკამენტი ხელმისაწვდომი ხდება და ის პაციენტებს უფასოდ გადაეცემათ.

"პაქსლოვიდი" "კოვიდ-19"-ის წინააღმდეგ შექმნილი პირველი ყველაზე ეფექტური წამალია. მედიკამენტი ვირუსის გამრავლების უნარის შეზღუდვას ახდენს. "პაქსლოვიდის" ინფიცირების დადასტურებისთანავე გამოყენების შემთხვევაში, დაავადება ვეღარ პროგრესირებს, რაც ამცირებს ჰოსპიტალიზაციის რისკს. მედიკამენტი 90%-მდე იცავს დაავადების გართულებისგან. "პაქსლოვიდით" მკურნალობა ვირუსის დადასტურების ადრეულ ეტაპზე უნდა დაიწყოს. მკურნალობის კურსი ხუთ დღეს მოიცავს. ჯანდაცვის სამინისტროს მიერ, კლინიკური ჯგუფის ექსპერტებთან ერთად, უკვე შემუშავებულია შესაბამისი პროტოკოლი, რომლის მიხედვითაც ის პრიორიტეტული პაციენტები განისაზღვრა, ვისთვისაც მედიკამენტებია განკუთვნილი. პრეპარატის გამოყენება მსუბუქი და საშუალო სიმძიმის იმ პაციენტებში მოხდება, ვისაც პროგნოზულად დამძიმების მაღალი რისკი აქვთ, როგორიცაა ქრონიკული დაავადების მქონე პირები, ხანდაზმულები და ა.შ. პრეპარატის დანიშვნის შესახებ გადაწყვეტილებას პაციენტის ოჯახის ექიმი მიიღებს და მისი მიწოდება ბინაზე მოხდება", - აცხადებენ ჯანდაცვის უწყებაში.

"კოვიდ-19"-ის სამკურნალო მედიკამენტი კომპანია Pfizer-მა შექმნა. "პაქსლოვიდი" აღიარებულია, როგორც აშშ-ს სურსათისა და წამლის სააგენტოს (FDA), ასევე ევროპის წამლის სააგენტოს (EMA) მიერ. პრეპარატი უკვე ფართოდ გამოიყენება, როგორც ამერიკის შეერთებულ შტატებში, ასევე ევროპის ქვეყნებში.