საგამოძიებო გამოცემა  „პროექტის“ ინფორმაციით, რუსეთის პრეზიდენტს ვლადიმირ პუტინს ხშირად ნახულობს ექიმი - ქირურგი ონკოლოგი. გამოცემა ინფორმაციას ავრცელებს მის ხელთ არსებული პირადი ექიმების სიაზე დაყრდნობით, რომლებიც ყველგან თან დაყვებიან რუსეთის პრეზიდენტს.

ერთ-ერთი მათგანია ცენტრალური კლინიკური საავამდყოფოს ექიმი ევგენი სელივანოვი. გამოცემის მონაცემებით, სელივანოვი სოჭში პუტინთან სულ მცირე 35-ჯერ ჩავიდა.

გამოძიება პირდაპირ არ ამტკიცებს, რომ პუტინს რაიმე დაავადება აწუხებს და არც კონკრეტულ დიაგნოზებზე საუბრობს. „პროექტის“ მონაცემებით, პუტინს სულ მცირე ორჯერ გაუკეთეს ან ოპერაცია, ან ძალიან სერიოზული პროცედურა, ზურგის არეში. „პროექტი“ აღნიშნავს, რომ ეს შემთხვევები ემთხვეოდა პუტინის გაუჩინარებას საჯარო სივრციდან.

გამოძიების თანახმად, ბოლო წლებში ყველაზე ხშირად რუსეთის პრეზიდენტს სოჭში აკითხავდა სამი ექიმი - ოტორინოლარინგოლოგები ალექსეი შეგლოვი, იგორ ესაკოვი და ზემოთ ნახსენები ქირურგი-ონკოლოგი ევგენი სელივანოვი.

„პროექტი“ აღნიშნავს, რომ ოთხი წლის განმავლობაში შეგლოვი სოჭში პუტინთან 59-ჯერ ჩავიდა და მის გვერდით 282 დღე გაატარა, ესაკოვი - 38-ჯერ, გაატარა 152 დღე, სელივანოვი კი 35-ჯერ და მასთან ერთად 166 დღე იმყოფებოდა. „ეს ჯგუფი პუტინის გვერდით არის, სოჭში, როგორც ოფიციალური ყოფნის, ისე საჯარო სივრციდან მისი გაუჩინარების დროსაც.

გამოძიებაში ასევე ნათქვამია, რომ ალტაიში ყოფნის დროს პუტინი იღებს აბაზანებს ირმის რქების ექსტრაქტით.