ყაზახეთი  რუსეთისა და ბელარუსის წინააღმდეგ ევროკვშირისა და აშშ-ის მიერ დაწესებული სანქციების გვერდის ავლის ინსტრუმენტი არ გახდება.

ამის შესახებ ყაზახეთის პრეზიდენტის ადმინისტრაციის ხელმძღვანელის პირველმა მოადგილემ ტიმურ სულეიმანოვმა Euractiv-თან ინტერვიუში განაცხადა, რომელშიც ისაუბრა ყაზახეთისა და ევროკავშირის მოლაპარაკებებზე.

მისი თქმით, მოლაპარაკების ერთ-ერთ მიზანს წარმოადგენდა ყაზახეთს დაედასტურებინა ევროპელი პარტნიორებისთვის, რომ ის არ გახდება რუსეთის წინააღმდეგ დაწესებული სანქციების გვერდის ავლის ინსტრუმენტი.

„იმის მიუხედავად, რომ ევრაზიის ეკონომიკური კავშირის წევრები ვართ რუსეთთან და ბელარუსთან და სხვა ქვეყნებთან ერთად, ასევე ვართ საერთაშორისო საზოგადოების წევრებიც.  აქედან გამომდინარე, ყველაზე ნაკლებად გვინდა, რომ აშშ-ისა და ევროკავშირის სანქციები ყაზახეთის მიმართაც იყოს გამოყენებული”, - განაცხადა სულეიმანოვმა.

„ყაზახეთი არ არის ამ კონფლიქტის ნაწილი. დიახ, ჩვენ შევდივართ ევრაზიის ეკონომიკურ კავშირში, მაგრამ ჩვენ დამოუკიდებელი სახელმწიფო ვართ და დავიცავთ შეზღუდვებს, რომლებიც რუსეთისა და ბელარუსის წინააღმდეგ არის დაწესებული“, - აღნიშნა სულეიმანოვმა.