ლიეტუვამ რუსული გაზის იმპორტი სრულად შეწყვიტა და ეროკავშირის პირველი ქვეყანა გახდა, რომელმაც აღნიშნული გადაწყვეტილება მიიღო. როგორც LRT იუწყება, ამის შესახებ ლიეტუვის ენერგეტიკის სამინისტროში განაცხადეს.

ახლა უკვე ლიეტუვა თხევადი ბუნებრივი აირის იმპორტს კლაიპედის ტერმინალის მეშვეობით ახორციელებს, რაც წინასწარი გათვლებით საკმარისი იქნება.  

აუცილებლობის შემთხვაში ასევე შესაძლებელია გაზის გადაქაჩვა ლატვიიდან, 1 მაისიდან კი - პოლონეთის ინტერკონექტორის საშუალებითაც.

ლიეტუვის ენერგეტიკის მინისტრმა  დაინიუს კრეივისმა ამ პროცესს ქვეყნის ენერგოდამოუკიდებლობის თვალსაზრისით გარდამტეხი მომენტი უწოდა. აღნიშნულთან დაკავშირებით კომენტარი გააკეთა ქვეყნის პრეზიდენტმა გიტანას ნაუსედამაც.

„ამ თვის დასაწყისიდან ლიეტუვაში აღარ იქნება რუსული გაზი. მრავალი წლის წინ ჩემმა ქვეყანამ მიიღო გადაწყვეტილება, რომელიც შესაძლებლობას გვაძლევს უმტკივნეულოდ გავწყვიტოთ ენერგეტიკული კავშირი აგრესორთან. თუ ჩვენ შევძელით, დანარჩენი ევროპაც შეძლებს“, - განაცხადა გიტანას ნაუსედამ.