გერმანიის თავდაცვის მინისტრი კრისტინ ლამბრეხტი აცხადებს, რომ რუსეთის მიერ  კიევის ოლქის დასახლებებში ჩადენილი ომის დანაშაულებისთვის ევროკავშირმა რუსულ გაზის იმპორტზე დაუყოვნებელივ უარი უნდა თქვას.

„ასეთი დანაშაულები უპასუხოდ არ უნდა დარჩეს“, - განაცხადა მან ტელეარხ ARD-თან ინტერვიუში.

ლამბრეხტმა აღნიშნა, რომ სკეპტიკურად არის განწყობილი მოსკოვთან ნებისმიერი შეთანხმების მიმართ.

„ჩვენ ვნახეთ, როგორ ცრუობენ ეს ადამიანები, როგორ გვატყუებენ, როგორ არ ასრულებენ დაპირებებს. ამიტომ ამ შემთხვევში მე ძალიან ფრთხილი ვარ, ძალიან სკეპტიკური“, - განაცხადა მან.

მანამდე, კანცლერმა ოლაფ შოლცმა ბუჩაში რუსეთის ძალების მიერ ჩადენილი მასობრივი მკვლელობები დაგმო და რუსეთს ახალი სანქციებით დაემუქრა. თუმცა რუსული გაზის იმპორტის დაუყოვნებლივ შეწყვეტაზე არაფერი უთქვამს. გერმანიის მთავრობამ ადრე განაცხადა, რომ რუსული გაზის სრულად შეწყვეტას 2024 წლის შუა პერიოდიდან აპირებს.

შეგახსენებთ, კიევის ოლქის ქალაქების გათავისუფლების შემდეგ უკრაინელ სამხედროებს უმძიმესი ვითარება დახვდათ. ქალაქების ქუჩებში მიმოფანტულია რუსი ოკუპანტების მიერ დახოცილი მშვიდობიანი მოქალაქეების ცხედრები.

რუსი სამხედროები წამებით ხოცავდნენ მშვიდობიან მოქალაქეებს, აუპატიურებდნენ ქალებს. ქალაქ ბუჩის მერის განხადებით, უკვე დაკრძალეს 300-მდე ცხედარი, თუმცა ქალაქში უამრავი ცხედარი რჩება. უმძიმესი კადრები სხვადასხვა მედიასაშუალებამ გაავრცელა, რომლებიც გათავისუფლებულ დასახლებებში იმყოფებოდნენ.

საერთაშორისო უფლებადამცველი ორგანიზაცია Human Rights Watch-ის განცხადებით, მათ აქვთ მტკიცებულებები რუსეთის არმიის მიერ უკრაინაში ჩადენილი ომის დანაშაულებისა.

ბუჩაში რუსეთის მიერ დატრიალებული სისასტიკე მკაცრად დაგმეს დასავლეთის ლიდერებმა