თბილისის მერია მზად არის, ერთ-ერთი მოედნისთვის "უკრაინის გმირების" სახელის მინიჭებაზე იმუშაოს - ამის შესახებ ნათქვამია საქართველოში უკრაინის საელჩოს მიერ გავრცელებულ განცხადებაში.

საელჩოს ცნობით, აღნიშნულ საკითხზე უკრაინის საქმეთა დროებითი რწმუნებულის ანდრეი კასიანოვისა და თბილისის მერის კახა კალაძის შეხვედრაზე იმსჯელეს.

"შეხვედრაზე განიხილეს რუსეთ-უკრაინის ომის გამო საქართველოს ტერიტორიაზე იძულებით მყოფი უკრაინის მოქალაქეების დახმარების გადაუდებელი საკითხები, საქართველოს სკოლამდელ სასწავლო დაწესებულებებში უკრაინული ჯგუფების შექმნა, ასევე კიევის საქალაქო სახელმწიფო ადმინისტრაციისთვის ფინანსური დახმარება.

კალაძემ აღნიშნა, რომ თბილისის მერია საკრებულოსთან თანამშრომლობით მზად არის, იმუშაოს თბილისის ერთ-ერთი მოედნისთვის "უკრაინის გმირების" სახელის მინიჭების საკითხზე.

უკრაინულმა მხარემ მადლობა გამოხატა თბილისის მერიის მიერ უკრაინისთვის 50 ტონა ჰუმანიტარული დახმარების მიწოდებისთვის (საკვები პროდუქტები, მედიკამენტები, ტანსაცმელი და ა.შ.)", - ნათქვამია საელჩოს ინფორმაციაში.