არის თუ არა მიზანშეწონილი, „არასათანდო“ ვუწოდოთ მეგობარ ქვეყანაში მიწვევას და მისი გასაჭირისა და მწუხარების გაზიარებას ან მხარდაჭერის გამოხატვას? - უკრაინის რადას თავმჯდომარე რუსლან სტეფანჩუკი საქართველოს პარლამენტის თავმჯდომარე შალვა პაპუაშვილს პასუხობს, რომელმაც ბუჩაში მიწვევას „არასათანადო“ უწოდა და იქ ჩასვლაზე უარი განაცხადა.

„ჩვენ ვიცით, რომ ქართველები ყოველთვის გულწრფელები, მამაცები და თავდადებული მეომრები არიან. ბევრი მათგანი დღეს უკრაინის დამცველების გვერდით დგას და იცავს უკრაინას რუსეთის შემოჭრისგან, ისევე, როგორც ბევრი უკრაინელი იდგა ქართველების გვერდით 2008 წელს იმავე რუსეთის წინააღმდეგ, რომელმაც ხელყო თქვენი დამოუკიდებლობა, თქვენი ტერიტორიის ნაწილი გადაყლაპა და ხალხი დახოცა.

რუსეთთან თქვენი დაპირისპირების პირველივე დღეებიდან უკრაინა მხარს უჭერდა საქართველოს: როგორც პოლიტიკურ, ასევე საინფორმაციო, საერთაშორისო და სამხედრო დონეზე. უბრალოდ შეგახსენებთ, რომ უკრაინული საჰაერო თავდაცვის სისტემების („ბუკ“, „ოსა“) წყალობით, თქვენ იცავდით თქვენს ცას. მაგრამ ჩვენ არ ვზომავთ მხარდაჭერის ზომებს. მხარდაჭერა ყოველთვის გულწრფელი უნდა იყოს. და ყველა, ვინც ასეთ დახმარებას უწევს, მოქმედებს ისე, როგორც მას საშუალებას აძლევს გარემოებები, სინდისი და ვალის შეგრძნება.

ერთადერთი, რაც მიუღებელი უსიამოვნების განცდას მიჩენს, არის შეკითხვა: არის თუ არა მიზანშეწონილი, „უადგილო“ ვუწოდოთ მეგობარ ქვეყანაში მიწვევას და მისი გასაჭირისა და მწუხარების გაზიარებას ან მხარდაჭერის გამოხატვას? ვფიქრობ, მეგობარმა ეს უნდა გააკეთოს მოწვევის გარეშე. ჩემი აზრით, ამაზე ლაპარაკობდა დიდი შოთა რუსთაველი: „ხამს მოყვარე მოყვრისათვის თავი ჭირსა არ დამრიდად, გული მისცეს გულისათვის, სიყვარული გზად და ხიდად“, – წერს უკრაინის რადას თავმჯდომარე.