ნატო-ში შვედეთისა და ფინეთის გაწევრიანება გამოიწვევს უარყოფით შედეგებს  ჩრდილოეთ ევროპაში მშვიდობისა და კონტინენტის უსაფრთხოების არქიტექტურისათვის, ასევე გავლენას მოახდენს რუსეთთან ურთიერთობაზე, - ამის შესახებ აგრესორი რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა.

„გასაგებია, რისთვის სჭირდება ეს ალიანსს. მისი მიზანია გააგრძელოს სამხედრო პოტენციალისა და გეოგრაფიული ექსპანსიის გაფართოება, რუსეთის საფრთხისთვის კიდევ ერთი ფლანგის შექმნა. მაგრამ გაუგებარია რაში სჭირდებათ ჩვენს ფინელ და შვედ მეზობლებს ბალტიის რეგიონში, გადაიქცეს ნატო-ს ბლოკსა და რუსეთს შორის დაპირისპირების ახალ საზღვრად? ჩრდილეოთ ევროპაში მშვიდობისა და სტაბილურობისთვის უარყოფითი შედეგები ნათელია“, - განაცხადა ზახაროვამ.

ზახაროვას აზრით, ჩრდილოატლანტიკურ ალიანსში წევრობა ვერ გააძლიერებს ფინეთისა და შვედეთის ეროვნულ უსფრთხოებას, ისინი „ავტომატურად მოხვდებიან ნატო-ს წინა ხაზზე“. „უფრო მეტიც, ნატო-ში წევრობა მოიაზრებს ფაქტობრივ უარს სუვერენიტეტზე თავდაცვის სფეროში გადაწყვეტილებების მიღებისას, ასევე საშინაო პოლიტიკაშიც“, - განაცხადა ზახაროვამ და აღნიშნა, რომ „არჩევანი შვედეთისა და ფინეთის ხელისუფლებაზეა“.

„მაგრამ მათ უნდა ესმოდეთ ასეთი ნაბიჯის შედეგები ჩვენი ორმხრივი ურთიერთობებისათვის და საერთოდ ევროპის  უსაფრთხოების არქიტექტურისათვის, რომელიც ახლა კრიზისულ მდგომარეობაშია, - აღნიშნა ზახაროვამ.

ნატო-ში შვედეთისა და ფინეთის შესაძლო გაწევრიანების საკითხის განხილვა უკრაინაში რუსეთის შეჭრის ფონზე დაიწყო. ბრიტანული გამოცემა The Times-ი წერდა, რომ ორივე ქვეყანა ალიანსში, შესაძლოა, უკვე 2022 წლის ზაფხულში გაწევრიანდეს.

ნატო-ში გაერთიანების შემდეგ ფინეთს ალიანსის წვერ ქვეყნებს შორის ყველაზე გრძელი საზღვარი ექნება რუსეთთან - 1 300 კმ-ზე მეტი. ფინეთ-რუსეთის საზღვარი სანქტ-პეტერბურგიდან 200 კმ-შია.