უკრაინის რადის დეპუტატი, პრეზიდენტ ზელენსკის პარტიის ფრაქციის თავმჯდომარე დავით არახამია აცხადებს, რომ მზად არის მიხაილო პოდოლიაკთან ერთად მარიუპოლში ჩავიდეს და რუსულ მხარესთან მოლაპარაკება გამართოს სამხედრო გარნიზონისა და მშვიდობიანი მოსახლეობის ევაკუაციის შესახებ.

არახამია ტელეგრამ-არხზე წერს, რომ მუდმივი კავშირი აქვთ მარიუპოლში მყოფ უკრაინულ ძალებთან და 20 აპრილს, ქალაქის დამცველებთან საუბრისას გახმოვანდა წინადადება, რომ მოლაპარაკების რაუნდი მარიუპოლში ჩატარდეს.

მანამდე მზადყოფნა დაადასტურა უკრაინის პრეზიდენტის ოფისის მრჩეველმა მიხაილო პოდოლიაკმაც. პოდოლიაკი ტვიტერზე წერს, რომ მზად არიან ყოველგვარი პირობების გარეშე მოლაპარაკების სპეციალური რაუნდი ჩაატარონ მარიუპოლში, რათა ქალაქიდან წაიყვანონ უკრაინელი მებრძოლები, სამოქალაქო პირები, ბავშვები, ცოცხლები და დაჭრილები.