21 აპრილს, დილით ტვერში, რუსეთის საჰაერო კოსმოსური ძალების ცენტრალური კვლევითი ინსტიტუტის ტერიტორიაზე მძლავრი ხანძარი გაჩნდა.

რუსული მედიის ინფორმაციით, ხანძარს, რომელიც ამ დროისთვის უკვე ლოკალიზებულია, 7 ადამიანი ემსხვერპლა, 27 ადამიანი დაშავდა და სამედიცინო დახმარება დასჭირდა.

ვარაუდობენ, რომ დამწვარი შენობის ნანგრევების ქვეშ მოყოლილია 10-მდე ადამიანი.

რეგიონული ადმინისტრაციის პრესსამსახური მანამდე იტყობინებოდა, რომ ხანძრის ჩაქრობაში 240 ადამიანი და 69 ტექნიკა იყო ჩართული.

ხანძარმა 2.5 ათასი კვ. მეტრის ფართობი მოიცვა. ხანძრის გამომწვევი მიზეზების გამოძიება მიმდინარეობს.

ზოგიერთი რუსული მედიასაშუალების ცნობით, ტვერის კვლევითი ინსტიტუტი მონაწილეობდა სარაკეტო კომპლექს "ისკანდერის" შემუშავებაში.