შეერთებული შტატების კონგრესის დელეგაცია, რომელიც საქართველოში ვიზიტით იმყოფება, ოპოზიციური პარტიების წარმომადგენლებს შეხვდა.

შეხვედრის დასრულების შემდეგ, დელეგაციის ხელმძღვანელმა კრის კუნსმა მედიასთან კომენტარი გააკეთა. კუნსის თქმით, ოპოზიციასთან შეხვედრა დადებით და კონსტრუქციულ გარემოში წარიმართა.

სენატორის განცხადებით, დემოკრატია მოითხოვს სამართლიან არჩევნებს, დამოუკიდებელ მართლმსაჯულებას, უსაფრთხოებას, ძლიერ ეკონომიკას და შეერთებული შტატები 30 წლის განმავლობაში ახორციელებდა ინვესტიციებს ამ სფეროებში.

"აშშ მტკიცედ უჭერს მხარს დემოკრატიას, დემოკრატია კი მოითხოვს თავისუფალ და სამართლიან არჩევნებს, დამოუკიდებელ მართლმსაჯულებას, უსაფრთხოებას და ძლიერ ეკონომიკას.

საქართველოს დამოუკიდებლობის 30 წლის განმავლობაში აშშ-მა არაერთხელ დააბანდა ინვესტიციები ჩემ მიერ ჩამოთვლილ სფეროებში. მათ შორის მოსამართლეების ტრენინგებში, უსაფრთხოების მხარდაჭერასა და ეკონომიკაში და განვითარებაში ინვესტიციების დაბანდებაში. თუ გვსურს დადებითი გზის გაგრძელება ევროკავშირის წევრობისკენ, მაშინ ესაა რეფორმების გაგრძელება მთავრობასა და საზოგადოებაში. ძალიან პოზიტიური და კონსტრუქციული ჩართულობა მქონდა საქართველოში. მადლიერი ვარ გამოყოფილი დროისთვის და მივესალმები პრესის თავისუფლებას", - განაცხადა კრის კუნსმა.