პოლკ „აზოვის“ მეთაურის მოადგილემ სვიატოსლავ პალამარმა BBC-თან ინტერვიუში განაცხადა, რომ მარიუპოლში, „აზოვსტალის“ ქარხნის ტერიტორიაზე  ასობით მშვიდობიანი მოქალაქე რჩება. მისივე თქმით, მარიუპოლის დამცველები დანებებას არ აპირებენ, მაგრამ მზად არიან ქალაქიდან გავიდნენ იარაღით და იმ პირობით, რომ მათ უსაფრთხოების გარანტი მესამე ქვეყანა იქნება.

პალამარი აღწერს ბოლო დღეებში უკრაინელი სამხედროების ბრძოლას რუსეთის არმიის წინააღმდეგ: „ქარხნის წინააღმდეგ შტურმი ღამითაც გრძელდება - საზღვაო არტილერიის  დახმარებით - ისვრიან ზღვიდან. ჰაერიდან ყრიან მძლავრ ბომბებს - მუდმივად მიმდინარეობს  ავიადარტყები, ბომბავენ ზალპური ცეცხლის საარტილერიო სისტემებიდან, ქვემეხებიდან“, - აღნიშნავს პალამარი.

სვიატოსლავ პალამარი ამბობს, რომ მასირებული დაბომბვების შედეგად სამრეწველო ზონაში შენობების უმეტესობა დანგრეულია. „აზოვსტალის“ ტერიტორია ფაქტობრივად განადგურებულია. ისინი {რუსები} იყენებენ მძლავრ ბომბებს, რომლებიც დიდ ნგრევას იწევენ, არიან დაჭრილები, დაღუპულები, სამოქალაქო პირები ნანგრევების ქვეშ არიან“, - აღნიშნავს პალამარი.

მშვიდობიანი მოქალქეების ზუსტი რაოდენობის შესახებ ზუსტი ცნობები არ არის. მანამდე მარიუპოლის მერი ვადიმ ბოიჩენკო ამბობდა, რომ „აზოვსტალის“ ტერიტორიაზე, შესაძლოა, იყოს 300-დან 1000-მდე ადამიანი.

როგორც პალამარი ამბობს, ეს ადამიანები იმყოფებიან ბუნკერებში, თითოეულ ბუნკერს 80-დან 100-მდე ადამიანი აფარებს თავს. „აქ არიან პატარა ბავშვები, სამი თვის ბავშვი, 14 წლის, ერთ-ერთ ბუნკერში 17 ბავშვია და 80-მდე უფროსი, ქალები, მოხუცები... ჩვენი აზრით, ასობით მშვიდობიანი ადამიანია. მაგრამ მათთვის ყველაფერს ვაკეთებთ, რაც შეგვიძლია“, - აღნიშნა პალამარმა.

მისივე თქმით, საერთაშორისო შუამავლებს შეუძლიათ დაეხმარონ ალყაში მოქცეული „აზოვსტალიდან“ მშვიდობიანი მოსახლეობისა და ქალაქის დამცველებს გამოსვლაში. მისი თქმით, 500-მდე დაჭრილი ჰყავთ.

პალამარი ამბობს, რომ რუსეთის წინადადებას იარაღი დაყარონ და ტყვედ ჩაბარდნენ, არ დათანხმდებიან. მისივე თქმით, რუსეთის ხელისუფლების განცხადება, რომ მათ მარიუპოლი აიღეს, ტყუილია. „მიმართვებში ყოველთვის ვამბობ, რომ ვიდრე ჩვენ აქ ვართ, მარიუპოლი უკრაინაა. მარიუპოლი ყოველთვის უკრაინაა, რაც არ უნდა თქვან. ბრძოლა გრძელდება. ჩვენ მარიუპოლის ტერიტორიაზე ვართ, თქვა პალამარმა.