რეალობა არის ასეთი – ჩვენ მათკენ, ზოგიერთი მათგანი ეშმაკებისკენ. არ ვარგა ასეთი დამოკიდებულება. ეს არ არის არც უკრაინის და არც საქართველოს ინტერესში, - ა საპარლამენტო უმრავლესობის წევრმა მიხეილ სარჯველაძემ კომენტარი გააკეთა უკრაინის რადას ფრაქცია „ხალხის მსახურის“ თავმჯდომარის განცხადებაზე, სადაც ის ამბობს, რომ შთაბეჭდილება დარჩა, საქართველოდან სამთავრობო დელეგაცია უკრაინაში ბუჩას ფონზე ფოტოების გადასაღებად ჩავიდა.

მისი თქმით, გულდასაწყვეტია დავით არახამიასგან ისეთი შეფასებების მოსმენა, როგორიც გუშინ გააკეთა.

„გულდასაწყვეტია, როცა ასეთ შეფასებებს ვისმენთ, როგორიც ბატონი არახამიასგან მოვისმინეთ, თუმცა უნდა ითქვას, რომ რეალური აღმოჩნდა ყველა ის განცხადება, პოზიცია, მოსაზრება, რომელიც გამოითქმებოდა. რამდენიმე დღის წინ ვივარაუდე, რომ მაინც იარსებებდა რაღაც ბაცილა, რომელიც შეეცდებოდა რამენაირად კიდევ გაემწვავებინა, გაერთულებინა ან გაეფუჭებინა ორ მოძმე ხალხს, ორ სტრატეგიულ პარტნიორ სახელმწიფოს შორის არსებული ურთიერთობები.

ბატონი არახამიას შემთხვევაში ურთიერთობების დაძაბვის სურვილს შეიძლება, განაპირობებდეს ერთადერთი მიზეზი – მისი ღირებულებების სისტემა თანაზიარია იმ ინტერესებისა და ღირებულებებისა, რომელიც აქვს საქართველოში ომის პარტიას „ნაციონალურ მოძრაობას“. ამ ხაზის გატარება, რომელი ღირებულებების სისტემითაც არც უკრაინის და არც საქართველოს სახელმწიფოს ინტერესები არ ექცევა როგორც მთავარი ინტერესი და ღირებულება, არამედ ვიწროპარტიული ხაზის გატარება არის ყოველთვის ამ პარტიებისა და ამ კატეგორიის ხალხის მთავარი საზრუნავი. ძალიან დიდი იმედი მაქვს, რომ რეალურად ამ ინტრიგებით დაკავებული კაცის ამ მორიგ მცდელობას, რომ რაღაცა ახალი ინტრიგა დათესოს, არ ექნება ფართო გამოხმაურება და ფართო მხარდაჭერა. რეალობა არის ასეთი – ჩვენ მათკენ, ზოგიერთი მათგანი ეშმაკებისკენ. არ ვარგა ასეთი დამოკიდებულება. ეს არ არის არც უკრაინის და არც საქართველოს ინტერესში“, – განაცხადა სარჯელაძემ.