შეერთებულმა შტატებმა უკრაინისთვის ზალპური ცეცხლის რეაქტიული სისტემების მიწოდება დაიწყო. ამის შესახებ აშშ-ის სახელმწიფო მდივნის მოადგილემ ვიქტორია ნულანდმა „ევროპეისკაია პრავდასთან“ ინტერვიუში განაცხადა. მისი თქმით, აშშ მუშაობს ნატოელ მოკავშირეებთან, რათა უკრაინამ მეტი რეაქტიული სისტემა მიიღოს.

ნულანდის განცხადებით, ზალპური ცეცხლის რეაქტიული სისტემები, ასევე საარტილერიო სისტემა აშშ-ის სამხედრო დახმარების ბოლო, 800 მლნ დოლარის ღირებულების პაკეტის შემადენლობაშია.

მან ასევე ისაუბრა უკრაინული თვითმფრინავების საბრძოლო მზადყოფნის საკითხზე და აღნიშნა, რომ ნატო-ს რამდენიმე სახელმწიფო, უკრაინას აწვდის კომპონენტებს, რომლებიც საშუალებას აძლევს მას ჰაერში მეტი თვითმფრინავი ჰყავდეს.

„და ახლა თქვენ გყავთ მეტი თვითმფრინავი მზადყოფნაში, ვიდრე ერთი კვირის წინ, სწორედ იმიტომ, რომ თქვენ მიიღეთ მოკავშირეებისგან სათადარიგო ნაწილები {თვითმფრინავებისათვის}... ამრიგად, აბსოლუტურად ნათელი რომ გახდეს, ჩამოვთვლი: ზალპური ცეცხლის რეაქტიული სისტემები უკვე მოწოდებულია, არიან მოკავშირეები, რომლებიც მუშაობენ თვითმფრინავებზე, ამის გარდა სამხედრო თვითმფრინავებისათვის არსებობს სათადარიგო ნაწილების უდიდესი რაოდენობა, რომელიც უკვე ცვლის სიტუაციას“, - განუცხადა ნულანდმა გამოცემას.

შეგახსენებთ, ამერიკის დახმარების ახალი 800 მლნ დოლარის ღირებულების პაკეტი ასევე მოიცავს მძიმე შეიარაღებას - ათობით ჰაუბიცას, ტაქტიკურ დრონებს და 144 ათას ერთეულ საბრძოლო მასალას და სხვა. ამრიგად, აშშ-სგან უკრანისთვის სამხედრო დახმარების მოცულობა 3,2 მლრდ დოლარამდე გაიზრდება. წინა ამავე ღირებულების პაკეტი მოიცავდა საარტილერიო სისტემებს, ჭურვებს, ჯავშანტრასპორტიორებსა და ვერტმფრენებს.