უკრაინის საზღვაო ქვეითების 36-ე ბრიგადის მეთაური სერჰი ვოლინა მორიგ ვიდეომიმართვაში ითხოვს მარიუპოლის დამცველების ევაკუაციისათვის გამოიყენონ დიუნკერკის ოპერაცია, რომელიც 1940 წელს, ჰიტლერის თანხმობით განხორციელდა.

„62-ე დღეა ვაწარმოებთ საბრძოლო მოქმედებებს სრულ ალყაში მოქცეულები, ახლა ტერიტორიულად ვიმყოფები „აზოვსტალის“ ქარხანაში, ვასრულებთ ამოცანას აზოვის პოლკთან და სხვა დანაყოფებთან ერთად...

ჩვენ 600-ზე მეტი დაჭრილი გვყავს სხვადასხვა სიმძმით, მათ სჭირდებათ სამედიცინო დახმარება. აქ არ არის არც პირობები, არც მედიკამენტები, არც პერსონალი, რომელიც დაგვეხმარებოდა. ასევე არიან დაჭრილები სამოქალაქო პირებს შორის, რომლებსაც ვეხმარებით, ისე, როგორც შეგვიძლია. ჩვენთან ერთად იმყოფებიან მშვიდობიანი მოქალაქეები, ათეულობით ბავშვი, შეზღუდული შესაძლებლობების მქონე პირები, მოხუცები. სიტუაცია რთულია, გვაქვს წყლის პრობლემა,“ - ამბობს ვოლინა.

ის მიმართავს მსოფლიო ლიდერებს, დიპლომატებს, რათა მარიუპოლის დამცველების გასაყვანდ გამოიყენონ მეორე მსოფლიო ომის დროინდელი „დიუნკერკის (დინამოს“) ოპერაცია.

„ახლა 1940 წელი არ არის, ახლა 2022 წელია. აქ ხალხი უბრალოდ იღუპება. დაჭრილები დაიღუპებიან, ცოცხლები კი - ომში მოკვდებიან. მშვიდობიანი ადამიანები აქ ჩვენთან ერთად იღუპებიან ბუნკერებში, კერძო სახლებში, კორპუსებში, მათ უბრალოდ ხვრეტენ“, - ამბობს ვოლინა.

1940 წელს ბრიტანელი და ფრანგი სამხედროები საფრანგეთის ქალაქ დიუნკერკის რაიონში გერმანიის ჯარმა ალყაში მოაქცია.

მათ კატასტროფა ემუქრებოდათ, მაგრამ ჰიტლერმა იერიშის შეწყვეტის ბრძანება გასცა.

სამაშველო ოპერაციის შედეგად ევაკუირებული იყო 300 ათასზე მეტი ფრანგი და ბრიტანელი ჯარისკაცი.