კიევის ოლქში, სოფელ ოსტროლუჩიეში პოლიციამ, უკრაინის შეიარაღებული ძალებისა და თავდაცვის სამინისტროს ჯარისკაცებთან ერთად რუსი სამხედრო იპოვა,  რომელიც, სავარაუდოდ,  ტერიტორიიდან რუსეთის არმიის გაყვანის შემდეგ დაიკარგა და გზა დაებნა.  ამის შესახებ ინფორმაციას უკრაინის ეროვნული პოლიცია Twitter-ზე ავრცელებს.

„თათრეთის მკვიდრმა, 21 წლის მეტყვიამფრქვევემ მექანიზირებული ბრიგადიდან აღიარა, რომ გზა დაებნა, რის შემდეგაც მიხვდა, რომ „მსოფლიოს მეორე არმიამ“ ის უბრალოდ მიატოვა“, - ნათქვამია ინფორმაციაში. ამასთან ნაპოვნოა რუსული სამხედრო ტექნიკაც

21 წლის ოკუპანტი უკრაინის უსაფრთხოების სამსახურის რეგიონალურ განყოფილებას გადაეცა.

კიევის ოლქი რუსი სამხედროებისაგნ 2 აპრილს გათავისუფლდა. გათავისუფლებულ ტერიტორიაზე შესულ უკრაინელ სამხედროებსა და სამართლადმცელებს შემაძრწუნებელი სურათი დახვდათ. ქალაქებსა და სოფლებში რუსი ოკუპანტების მხრიდან ადგილი ჰქონდა მშვიდობიანი მოსახლეობის მასობრივ მკვლელობებს. ბუჩაში, ბოროდიანკასა და სხვა დასახლებებში აღმოჩენილია 2 ათასამდე მშვიდობიანი მოქალაქის ცხედარი, რომელთა უმეტესობას აღენიშნება წამების კვალი. ცხედრები ნაპოვნია სარდაფებშიც, სადაც ოკუპანტები ადგილობრივებს აწამებდნენ და ხვრეტდნენ. დაფიქსირებულია ასეული გაუპატიურების შემთხვევა. რუსი სამხედროები აუპატიურებდნენ ქალებსა და მცირეწლოვან ბაშვებს.

 მიუხედავად არაერთი მტკიცებულებისა, რუსეთი უარყოფს მისი სამხედროების მხრიდან უკრაინის მშვიდობიან მოსახლეობაზე თავდასხმას და "დადგმულს" უწოდებს საერთაშორისო მედიაში გავრცელებულ, ომის დანაშაულის ამსახველ ფოტო და ვიდეომასალებს.

ლატვიის, ესტონეთისა და კანადის პარლამენტებმა უკრაინაში რუსეთის ქმედებები უკრაინელი ერის გენოციდად აღიარეს. აღნიშნულ საკითხზე სხვა ქვეყნების საკანონმდებლო ორგანოებიც მუშაობენ.