რუსეთის საგარეო საქმეთა სამინისტრო ისრაელს "კიევის ნეონაცისტური რეჟიმის" მხარდაჭერაში ადანაშაულებს.

რუსეთის საგარეო საქმეთა სამინისტრო ეხმიანება საერთაშორისო სკანდალს, რომელიც სერგეი ლავროვის იტალიურ მედიაში გაკეთებულ განცხადებას მოჰყვა. ლავროვმა განაცხადა, რომ "ადოლფ ჰიტლერსაც ებრაული სისხლი ჰქონდა", ხოლო "ყველაზე მგზნებარე ანტისემიტები კი როგორც წესი, ებრაელები იყვნენ".

წინა დღით, ლავროვის ამ განცხადების გამო, ისრაელის საგარეო საქმეთა სამინისტრომ რუსეთის ელჩი დაიბარა და მოსკოვისგან ოფიციალური ბოდიშის მოხდა მოითხოვა.

"ლავროვის განცხადება გარდა იმისა, რომ აღმაშფოთებელი და უპატიებელია, ის ასევე საშინელი ისტორიული შეცდომაა. ებრაელები თავიანთ თავს არ ანადგურებდნენ ჰოლოკოსტის დროს. ებრაელების დადანაშაულება ანსტისემიტიზმში რასიზმის ყველაზე დაბალი დონეა", - განაცხადა ისრაელის საგარეო საქმეთა მინისტრმა იარირ ლაპიდმა ლავროვის განცხადების კომენტირებისას.

3 მაისს, რუსეთის საგარეო საქმეთა სამინისტრომ ისრაელის საგარეო საქმეთა მინისტრის საპასუხოდ ვრცელი განცხადება გამოაქვეყნა, სადაც ისრაელი უკრაინის "ნეონაცისტური რეჟიმის" მხარდაჭერაში დაადანაშაულა. ამასთან, რუსეთის საგარეო უწყებამ იაირ ლაპიდის განცხადებას "ანტიისტორიული" უწოდა.

საგარეო საქმეთა სამინისტროს განცხადებაში ასევე ნათქვამია, რომ "სამწუხაროდ, ისტორიამ იცის ებრაელებსა და ნაცისტებს შორის თანამშრომლობის ტრაგიკული მაგალითები".

"ამავდროულად, ისტორიული ტრაგედია მდგომარეობს იმაში, რომ თუ მეორე მსოფლიო ომის დროს ზოგიერთ ებრაელს აიძულებდნენ მონაწილეობა მიეღო დანაშაულებში, [უკრაინის პრეზიდენტი] ზელენსკი, რომელიც სპეკულირებს მის [ებრაულ] ფესვებზე, ამას აკეთებს საკმაოდ შეგნებულად და ნებაყოფლობით. ის იმალება თავისი წარმომავლობის მიღმა და იფარავს ბუნებრივ ნეო-ნაცისტებს, თავისი ხალხის ჯალათების სულიერ და სისხლით მემკვიდრეებს", - ნათქვამია რუსეთის საგარეო საქმეთა სამინისტროს განცხადებაში.