მიხეილ სააკაშვილი თვითგვემას აწარმოებს და გარკვეულწილად ამას თვითდაზიანებაც დავარქვათ, რადგან კონკრეტული ადამიანისთვის შეთავაზებული მკურნალობა არის მიუღებელი. ჯანდაცვის საკითხები პოლიტიკოსების მსჯელობის საგანი არ უნდა იყოს, - ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისი თქმით, თუ ადამიანი თვითგვემას და თვითდაზიანებას ეწევა, მას არ შეიძლება ჯანსაღი შესახედაობა ჰქონდეს.

„ვხედავთ, რომ მიხეილ სააკაშვილი თვითგვემას აწარმოებს და გარკვეულწილად ამას თვითდაზიანებაც დავარქვათ, რადგან კონკრეტული ადამიანისთვის შეთავაზებული მკურნალობა არის მიუღებელი. ჯანდაცვის საკითხები პოლიტიკოსების მსჯელობის საგანი არ უნდა იყოს, ეს ექიმების საქმეა. ბიძინა ივანიშვილი არის ოპოზიციის შეტევის სამიზნე, ეს მუდმივად ასე იქნება და არ მოიშლება. რასაკვირველია, ამის გამო იკარგება ის პროექტი, როცა მთელი მთაწმინდის ფერდობი და ნარგავები უნდა შეიცვალოს მისი ორგანიზაციის ქველმოქმედებით და თბილისმა სუფთა ჰაერის ახალი ტალღა უნდა მიიღოს. ასევე ახორციელებს უშველებელ პროექტს სიმსივნის სამკურნალოდ. ეს არის მისი მთავარი ამოცანები და პროექტები. რაც შეეხება მიხეილ სააკაშვილთან დეპუტატის შესვლის საკითხს, ეს ბიძინა ივანიშვილის კომპეტენციის სფეროდანაც გადის და პოლიტიკაში არ მონაწილეობს. დიმიტრი ხუნდაძის ან დავით სერგეენკოს ციხეში შესვლა არის მხოლოდ ის თამაში, რომელსაც სააკაშვილი საზოგადოებას კარნახობს. რასაკვირველია, სერგეენკო და ხუნდაძე ამაში მონაწილეობას ვერ მიიღებენ. თუ ადამიანი თვითგვემას და თვითდაზიანებას ეწევა, რასაკვირველია, მას არ შეიძლება ჯანსაღი შესახედაობა ჰქონდეს, თუნდაც, როცა სასამართლოში მღერის, მხარდამჭერებს აჯანყებისკენ ან მასიური მღელვარების ორგანიზებისკენ მოუწოდებს. ეს არაჯანსაღად მიმაჩნია, მაგრამ პროფესიონალი არ ვარ, საკმაოდ ბევრი პროფესიონალია რომ მას შესაბამისი მკურნალობა გაუწიონ“, – განაცხადა ვოლსკიმ.