ყატარის ტელეკომპანია „ალ-ჯაზირამ“ 9 მაისს გადასცა რეპორტაჟი, რომელშიც ნაჩვენებია უკრაინაში დაღუპული რუსი სამხედროების ცხედრებით სავსე ვაგონი-მაცივარი.

კადრებში ჩანს სამხედრო ფორმები, რომელსაც რუსული არმია იყენებს, ასევე რუსეთში წარმოებული ჯავშანჟილეტის ეტიკეტი. ამასთან, დაღუპულ რუს სამხედროებს ჯიბეებში აღმოაჩნდათ ნაძარცვი ძვირფასი ნივთები, რომლებიც კიევის ოლქის დროებით ოკუპაციის დროს მიისაკუთრეს. 

ტელეარხის ინფორმაციით, ვაგონი კიევის ოლქშია გადაღებული და საუბარია იმ სამხედროების ცხედრებზე, რომლებიც რუსულმა მხარემ არ მოითხოვა და მიატოვა.

უკრაინაში შეჭრის შემდეგ რუსეთმა მხოლოდ ორჯერ გაავრცელა ინფორმაცია რუსული არმიის დანაკარგის შესახებ. ბოლოს ეს მოხდა 25 მარტს - მაშინ რუსეთის თავდაცვის სამინისტრომ განაცხადა, რომ დაიღუპა 1 351 სამხედრო, 3 825 კი დაიჭრა. უკრაინის მხარე აცხადებს, რომ მტრის დანაკარგი გაცილებით დიდია. 10 მაისის მონაცემებით, რუსეთის საოკუპაციო არმიამ უკრაინაში უკვე 25 650 სამხედრო დაკარგა.