გაეროს გენერალური მდივანი ანტონიუ გუტერეში აწარმოებს მოლაპარაკებებს დასავლეთის სანქციების შემსუბუქებაზე რუსეთიდან და ბელარუსიდან კალიუმის სასუქების ექსპორტზე, შავ ზღვაში უკრაინის პორტებისთვის ბლოკირების მოხსნის სანაცვლოდ, რათა უკრაინამ შეძლოს საზღვარგარეთ თავისი ხორბლეულის გაყიდვა. ამის შესახებ გამოცემა Wall Street Journal იუწყება.

თუმცა, ამ მომენტისთვის რუსეთი არ აწარმოებს სერიოზულ მოლაპარაკებებს აღნიშნული გარიგების თაობაზე. ამასთან, თურქეთმა გამოთქვა მზადყოფნა მონაწილეობა მიიღოს ამ შეთანხმებაში შავი ზღვის განაღმვასა და რეგიონში ტრანსპორტირებაზე კონტროლის მიმართულებით.

ჟურნალისტები აღნიშნავენ, რომ რუსეთი და ბელარუსი კალიუმის სასუქების მთავარი მიმწოდებლები არიან. ამ მომენტისთვის, აღნიშნული პროდუქციის ექსპორტი დასავლეთის მიერ დაწესებული სანქციების გამო აკრძალულია.

გაეროს მონაცემებით, მსოფლიოს მეხუთედზე მეტს - 1,7 მილიარდამდე ადამიანს შიმშილი და სიღატაკის ემუქრება, უკრაინაში რუსეთის სრულმასშტაბიანი შეჭრის ფონზე და ამ ქვეყნებიდან სურსათის ექპორტის ბლოკირების გამო.

ამასთან, უკრაინული მედიის ინფორმაციით, რუსი სამხედროები ხორბალს დროებით ოკუპირებული ტერიტორიებიდან იპარავენ.