ოპოზიციური პარტიების წარმომადგენლები აშშ-ის სახელმწიფო მდივნის უფროს მრჩეველს დერეკ შოლეს შეხვდნენ.

შეხვედრის დასრულების შემდეგ, მედიასთან კომენტარი გააკეთა "ნაციონალური მოძრაობის" თავმჯდომარემ, ნიკა მელიამ. მისი განცხადებით, დერეკ შოლესთან შეხვედრაზე ქვეყანაში არსებული პოლიტიკური ვითარებაზე, პოლიტიზირებული მართლმსაჯულებაზე, პოლიტპატიმრებზე, დასავლური კურსზე, ოლიგარქიასა და უსაფრთხოების კუთხით გამოწვევებზე ისაუბრეს.

მელიას მტკიცებით, ბიძინა ივანიშვილი უმკაცრესი მონიტორინგის ქვეშ არის.

"ბიძინა ივანიშვილი არის უმკაცრესი მონიტორინგის ქვეშ. მისი ეკონომიკური საქმიანობა არის ძალიან დიდი ყურადღების ქვეშ და მას უკვე შეექმნა მისთვის სერიოზული და სამართლიანი პრობლემები სხვადასხვა ტრანზაქციებთან მიმართებაში. ეს ყველაფერი შემთხვევით არ ხდება", - განაცხადა მელიამ.

როგორც ნიკა მელია ამბობს, შეხვედრაზე დარჩა შთაბეჭდილება, რომ ნიკა გვარამიასთან დაკავშირებით ზომები ძალიან სწრაფად იქნება მიღებული.

"ნიკა გვარამიასთან და მიხეილ სააკაშვილთან დაკავშირებითაც იყო სრულყოფილად საუბარი. პოლიტიკური პატიმრობა, რომ სენსაციად აღარ აღიქმება ჩვენს ქვეყანაში, ეს არის უფრო შემაშფოთებელია ჩვენი პარტნიორებისთვის. ამ ვითარებას ამძიმებს გარემოება, რომელშიც მიხეილ სააკაშვილი იმყოფება, იგი იბრძვის სიცოცხლისთვის და ებრძვის სიკვდილს და აქაც ძალიან მნიშვნელოვანია ჩვენი პარტნიორი სახელმწიფოს წარმადგენლების როლი და აქაც როგორც არასოდეს, ვარ ოპტიმისტურად განწყობილი, რომ ეს ვითარება ძალიან მალე შეიცვლება მიხეილ სააკაშვილის, როგორც უსამართლოდ ტყვეობაში მყოფი ადამიანის სასარგებლოდა და იგი იქნება გადაყვანილი შესაბამის ევროპულ სახელმწიფოში, შესაბამის სამედიცინო დაწესებულებაში.

ნიკა გვარამიასთან დაკავშირებით საერთოდ კითხვის ნიშანიც კი არ ისმის თუ ვინმე არის ყველა გაგებით პოლიტიკური პატიმარი, მედიაწარმომადგენელი და ეს იყო პირველი შემთხვევა, აქამდე გვინახავს აქტივისტები, პოლიტიკური პარტიების წარმომადგენლები პატიმრობაში, მაგრამ უფრო შორს წავიდა "ოცნება" და ჟურნალისტი, უსაფუძვლოდ დააკავეს და ვფიქრობ, რომ ნიკა გვარამიასთან დაკავშირებით, ზომები ძალიან სწრაფად იქნება მიღებული და მალე დაგიბრუნდებათ თქვენ ტელევიზიაში" განაცხადა ნიკა მელიამ.