დონბასში უკრაინა ძალების მართვის ეფექტიანობას ინარჩუნებს, მაგრამ რუსეთს აქვს რამდენიმე ლოკალური წარმატება ლუჰანსკში. თუმცა მისმა წინსვლამ დასავლეთით შესაძლოა, შექმნას სირთულეები არმიის მომარაგებაში.

ინფორმაციას ბრიტანეთის თავდაცის სამინისტრო ავრცელებს.

უწყების ცნობით, რუსეთმა გააძლიერა ოპერაციების ინტენსივობა დონბასში, ცდილობს სევერდონეცკის, ლისიჩანსკისა და რუბეჟნოეს ალყაში მოქცევას. ჩრდილოეთ და სამხრეთ ღერძი გაყოფილია 25 კმ ტერიტორიით, რომელსაც უკრაინა აკონტროლებს.

„უკრაინამ გასწია მედგარი წინააღმდეგობა: ძალებმა დაიკავეს კარგად განლაგებული თავდაცვითი პოზიციები. როგორც ჩანს, უკრაინის გაერთიანებული ძალების ოპერაცია ინარჩუნებს მართვის ეფექტიანობას და ამ ფრონტზე კონტროლს. მაგრამ რუსეთმა მიაღწია გარკვეულ ლოკალურ წარმატებას, ნაწილობრივ საარტილერიო დანაყოფების კონცენტრაციის გამო.

რუსეთის მიერ სევეროდონეცკის „ჯიბის“ დაკავება გამოიწვევს მთელი ლუჰანსკის ოლქის ოკუპაციას. იმის მიუხედავად, რომ ახლა ეს არის რუსეთის მთავარი ძალისხმევა, ეს ოპერაცია მხოლოდ რუსული კამპანიის ნაწილია დონბასის დასაპყრობად.

ბრიტანეთის დაზვერვის წარმომადგენლებს მიაჩნიათ, რომ თუ ფრონტის ხაზი დონბასში დასავლეთისკენ გადაინაცვლებს, ეს გააფართოებს რუსეთის კომუნიკაციის ხაზს და სავარაუდოდ, მის ძალებს დამატებთი ლოჯისტკური სირთულეები შეექმნებათ.