თურქეთმა ნატო-ში შვედეთისა და ფინეთის გაწევრიანებაზე თანხმობისთვის თავისი მოთხოვნები გაასაჯაროვა.

შესაბამისი კომუნიკე მთავრობის პრეს-სამსაურმა გამოაქვეყნა. მოთხონების პირველი პუნქტი წარმოადგენს კონკრეტულ გარანტიებს შვედეთისგან ქურთების ორგანიზაციებისა და გიულენის მომხრეების მიმართ, რომლებსაც თურქეთი ტერორისტებად მიიჩნევს. კერძოდ, ანკარა ითხოვს შეწყდეს მათი პოლიტიკური და ფინანსური მხარდაჭერა.

თურქეთი აცხადებს, რომ შვედეთი იარაღით ეხმარება ქურთულ პარტია PKK/PYD-ს, აწვდის დრონებსა და ტანკსაწინააღმდეგო იარაღს.

თურქეთი ასევე მოითხოვს მის მიმართ  შვედეთის ემბარგოს და სანქციების მოხსნას „თურქეთის ლეგიტიმური ქმედებების საპასუხოდ, რათა დაიცვას თავისი საერთაშორისო უფლებები ხმელთაშუა ზღვაში და დაიცვას სირიის საზღვრები“.

თურქეთის მოთხოვნის ბოლო პუნქტია - „გლობალური თანამშრომლობა ტერორიზმთან ბრძოლაში“.

„ჩვენ ნატო-ს ღია კარის პოლიტიკის ერთგულნი ვრჩებით, მაგრამ მიგვაჩნია, რომ ალიანსმა და კანდიდატმა ქვეყნებმა უნდა ითანამშრომლონ ტერორიზმთან ბრძოლაში, როგორც ისინი ამას აკეთებენ სხვა სფეროებში. ჩვენ ველით შვედეთისგან, რომელმაც განაცხადი შეიტანა, პრინციპულ ნაბიჯებსა და კონკრეტულ გარანტიებს უსაფრთხოების საკითხებში, რიმელიც თურქეთს აღელვებს“, - ნათქვამია კომუნიკეში.

თურქეთი ნატო-ს წევრი ერთადერთი ქვეყანაა, რომელიც ალიანსში შვედეთისა და ფინეთის გაწევრიანების წინააღმდეგია. არაოფიციალურად ცნობილია, რომ ერდოღანი იმედოვნებს, რომ მიიღებს გარკვეულ დათმობებს შეერთებული შტატებისგან თვითმფრინავების გაყიდვასა და თურქეთის მიმართ რუსული С-400 შეძენაზე სანქციებთან დაკავშირებით.